ე.წ მატროსოვის ციხეში დეკანოზ გიორგი მამალაძეს საკუთარ ადვოკატებთან ერთად სახაზინო ადვოკატიც მოინახულებს. სასჯელაღსრულების ნომერ მე-9 დაწესებულებაში ადვოკატები დღის 14:00 საათისთვის გეგმავენ მისვლას. შეხვედრის მიზეზი ხვალინდელი სასამართლო სხდომაა, რომელზეც მხარეებმა შესავალი სიტყვა უნდა წარმოსთქვან.

"დეკანოზთან პოზიციების შეთანხმება გვსურს, ვემზადებით მნიშვნელოვანი პროცესისთვის, რომელზეც ჩვენი მოსაზრებები უნდა წარმოვთქვათ. ხვალინდელ პროცესს დაესწრება თავად დეკანოზი გიორგი მამალაძეც", - განაცხადა ჟურნალისტებთან ადვოკატმა გიორგი ფანცულაიამ.