მოსკოვმა ანატოლი ბიბილოვის ინიციატივას, რომლის მიხედვითაც ცხინვალის გავლით ტვირთების ტრანზიტი მოხდება, მხარი დაუჭირა.
განცხადება რუსეთის საგარეო საქმეთა სამინისტრომ გაავრცელა. ე.წ. სამხრეთ ოსეთის დე ფაქტო ლიდერმა რუსეთიდან ტვირთების შესაძლო ტრანზიტზე განცხადება სანქტ-პეტერბურგში, საერთაშორისო ეკონომიკურ ფორუმში მონაწილეობისას გააკეთა.
„მივესალმებით ამ კონსტრუქციულ და პასუხისმგებლობიან პოზიციას, რომელიც რეგიონის ყველა ქვეყნის ინტერესების გათვალისწინებით ამიერკავკასიაში სავაჭრო-ეკონომიკური კომუნიკაციების სისტემის განვითარების რეალურ პერსპექტივას ხსნის. მოვუწოდებთ თბილისსაც, გამოიჩინოს მსგავსი კონსტრუქციული განწყობა“, - აღნიშნულია განცხადებაში.
რუსეთის საგარეო უწყების მიერ გავრცელებული განცხადება 2011 წელს გაფორმებულ შეთანხმებასაც ეხება, რომელიც საქართველოსა და რუსეთს შორის საბაჟო ადმინისტრირებისა და სავაჭრო მონიტორინგის საკითხებს განსაზღვრავს.
„მისი პრაქტიკული რეალიზაციის უსწრაფესი დაწყება მნიშვნელოვან წვლილს შეიტანდა რეგიონში საერთაშორისო ვაჭრობის განვითარებაში. სამწუხაროდ, ქართული მხარე დიდი ხნის განმავლობაში თავს იკავებს შეთანხმებით გათვალისწინებული ვალდებულებების დადასტურებისგან. იმედი გვაქვს, რომ ეს მიდგომა შეიცვლება“, - აღნიშნულია განცხადებაში.