„ქართული მიწის დაცვის ჯგუფის“ წევრები ამ დროისთვის საზოგადოებრივი მაუწყებლის მენეჯმენტს ხვდებიან.
საზოგადოებრივი მაუწყებლის გენერალური დირექტორი ვასილ მაღლაფერიძე აქციის მონაწილეებთან თავად ჩავიდა და „ქართული მიწის დაცვის ჯგუფის“ რამდენიმე წევრი ტელევიზიის შენობაში შეიყვანა .
როგორც ჯგუფის წევრები სანდრო ბრეგაძე და ლადო სადღობელაშვილი აცხადებენ, მათ სურთ საეთერო დრო იმისთვის, რომ სასოფლო -სამეურნეო მიწების უცხოელებზე გასხვისების მუხლთან დაკავშირებით დააფიქსირონ საკუთარი პოზიცია, მაუწყებელი კი, მათი თქმით, პირდაპირ ეთერში არ იწვევს.
"უნდა მოგვისმინოთ, საზოგადოების დიდი ნაწილი ვართ. აქციით მოსვლა არ უნდა გვჭირდებოდეს იმისთვის, რომ ეთერი დაგვითმოთ", - აცხადებენ „ქართული მიწის დაცვის ჯგუფის“ წევრები.
საზოგადოებრივი მაუწყებლის გენერალური დირექტორი ვასილ მაღლაფერიძის განცხადებით, მაუწყებელი საზოგადოებისთვის ყველა მნიშვნელოვან თემას და საკითხს აშუქებს და ეთერზე უარს არავის ეუბნება.
"გუშინ საღამოს დაახლოებით 17:00 საათზე შემოვიდა თქვენი განცხადება ეთერის მოთხოვნის თაობაზე. მე ვთხოვე მეორე არხის ხელმძღვანელობას, მოეწვიათ რამდენიმე ადამიანი, რამდენადაც ვიცი, თქვენ ამ შეთავაზებაზე უარი განაცხადეთ და მოითხოვეთ მხოლოდ პირველი არხის ეთერი", - განუცხადა ჯგუფის წევრებს ვასილ მაღლაფერიძემ.
მისივე თქმით, ულტიმატუმებით მაუწყებელთა არავინ ისაუბრებს და ჟურნალისტები ისე გააშუქებენ თემას, როგორც საჭიროდ მიიჩნევენ.
„ქართული მიწის დაცვის ჯგუფის" წევრებმა საზოგადოებრივი მაუწყებლის შენობის წინ აქცია გამართეს.