გარემოსა და ბუნებრივი რესურსების დაცვის სამინისტრომ საერთაშორისო და ადგილობრივი ექსპერტების მონაწილეობით ,,გარემოსდაცვითი შეფასების კოდექსი“ შეიმუშავა, რომელიც საქართველოს პარლამენტმა მესამე მოსმენით მიიღო.
კანონპროექტი ინიცირებული იქნა საქართველოსა და ევროკავშირს შორის დადებული ასოცირების ხელშეკრულებიდან გამომდინარე, რომლის შესაბამისად ქვეყანამ ევროკანონმდებლობასთან ჰარმონიზების ვალდებულება აიღო.
გარემოს დაცვის მიმართულებით უმნიშვნელოვანესია ქვეყანაში სწორი გარემოსდაცვითი მმართველობის ჩამოყალიბება და გარემოზე ზემოქმედების შეფასების სისტემის სრულყოფა. მიღებული კოდექსი გარემოსდაცვითი შეფასების საკითხებს სრულიად ახლებურად არეგულირებს, კერძოდ:
გარემოსდაცვითი გადაწყვეტილება, რომელმაც ჩაანაცვლა გარემოზე ზემოქმედების ნებართვა, გამოეყო მშენებლობის ნებართვას, თუმცა, ამავდროულად, საქმიანობის განმახორციელებელს მიენიჭა უფლება პარალელურ რეჟიმში გაიაროს მშენებლობის ნებართვის პროცედურები.
გაიზარდა გარემოზე ზემოქმედების შეფასებას დაქვემდებარებული საქმიანობები და განხორციელდა მათი რანჟირება მასშტაბებისა და ზემოქმედების ხარისხის მიხედვით;
ჩამოყალიბდა გადაწყვეტილების მიღების პროცესში საზოგადოების მონაწილეობის ეფექტიანი მექანიზმები, რაც უზრუნველყოფს საზოგადოების ჩართულობის მაღალ სტანდარტებს, გადაწყვეტილების მიღების ყველა ეტაპზე.
დაინერგა სტრატეგიული გარემოსდაცვითი შეფასების სისტემა, რომელიც უზრუნველყოფს სხვადასხვა სექტორების დაგეგმარების პროცესში გარემოსდაცვითი, სოციალური და ჯანდაცვის ასპექტების გათვალისწინებას;
კოდექსი სრულად ჰარმონიზებულია ევროკავშირის შესაბამის დირექტივებთან, აგრეთვე მაქსიმალურად არის მორგებული ქვეყნის საკანონმდებლო სივრცესა და რეალობას.