სრულიად საქართველოს კათოლიკოს პატრიარქი ამაღლების დღესასწაულზე, 24 მაისს ლოცვას სამების საკათედრო ტაძარში ჩაატარებს, ხოლო 25 მაისს საზემო წირვას, ამაღლების ტაძარში აღავლენს - ამის შესახებ ილია მეორემ საკვირაო ქადაგებისას ისაუბრა.
დღეს კი მართლმადიდებელი ეკლესია წმინდა იოანე ღვთისმეტყველის დღესასწაულს აღნიშნავს.
უწმინდესმა ქადაგებისას მრევლს დღევანდელი დღე მიულოცა და აღნიშნა, რომ სიყვარული არის საფუძველი ადამიანის არსებობისა და ამის გარეშე ადამიანი ვერ იცოცხლებს.
„გილოცავთ ამ დიდებულ დღესასწაულს, წმინდა იოანე არის სიყვარულის მქადაგებელი. სიყვარული არის საფუძველი ადამიანის არსებობისა, ამის გარეშე ადამიანი ვერ იცოცხლებს, ვერ იარსებებს. გფარავდეთ , წმინდა იოანე ღვთისმეტყველი თქვენ და სრულიად საქათველოს“ - განაცხადა ილია მეორემ .
ქადაგების დასრულების შემდეგ უწმინდესმა ნიქოზისა და ცხინვალის მიტროპოლოტი, მეუფე ისაია სკუფიაზე ბრილიანტის ჯვრის ტარების უფლებით დააჯილდოვა.
„დღეს ჩვენ ვაჯილდოებთ უმაღლესი ჯილდოთი მეუფე ისაიას. მეუფე თავდადებულად მოღვაწეობს ისეთ რთულ ეპარქიაში, რომელიც მას დაეკისრა. ღმერთმა ძალა და მადლი მისცეს მას. ამასთან დაკავშირებით ვაჯილდოებთ სკუფიაზე ბრილიანტის ჯვრის ტარების უფლებით",- განაცხადა უწმინდესმა.
დღესვე სრულიად საქართველოს კათოლიკოს პატრიარქმა ტრადიციულად რამდენიმე გვარი დალოცა.