დეკანოზ გიორგი მამალაძის საქმის განხილვის სრულად დახურვას გაუმართლებლად მიიჩნევს „ახალგაზრდა იურისტთა ასოციაცია“ და განცხადებას ავრცელებს.
საიაში თვლიან, რომ მოსამართლის განჩინება მხარეებს არათანაბარ მდგომარეობაში აყენებს. ორგანიზაციის განცხადებით, სასამართლო სხდომის საჯაროობა მნიშვნელოვანია, როგორც ინდივიდის უფლებების სრულყოფილად რეალიზებისთვის, ასევე საზოგადოებისთვის, ვინაიდან საჯარო განხილვა მხარეებს იცავს, საზოგადოების მეთვალყურეობის გარეშე, მართლმსაჯულების საიდუმლო განხორციელებისგან. პირთა პირადი ცხოვრების უფლების და პრესონალური მონაცემების დაცვის საჭიროების შემთხვევაში კი, საჯაროობის უფლების ნაკლებად შემზღუდველი მექნიზმი, სხდომის ნაწილობრივ დახურვა უნდა იქნეს გამოყენებული.
საჯაროობა წარმოადგენს ერთადერთ შესაძლებლობას, ბრალდებულმა და დაცვის მხარემ პასუხი გასცენ საზოგადოებაში არსებულ შეკითხვებს, რომელიც, მათ შორის, პროკურატურის მხრიდან ცალმხრივად გამოქვეყნებულმა მტკიცებულებებმა გამოიწვია - ვკითხულობთ საიას განცხადებაში.
პარალელურად, სააპელაციო სასამართლოში შესატანად საჩივარს ამზადებენ დეკანოზის ადვოკატები. უფლებადამცველები სხდომიდან მათი გაძევების გადაწყვეტილების ბათილად ცნობას მოითხოვენ. გიორგი მამალაძის საქმზე არსებითი განხილვა 19 მაისს გაგრძელდება.