საზოგადოებრივი მაუწყებლი ფრაზებით რუსთაველის კვირეულს შეუერთდა. მაუწყებლის სახეებსა და ყველა მსურველს საშუალება აქვთ, „ვეფხისტყაოსნის“ სტროფები წაიკითხოს და ვიდეორგოლი ჩაწეროს.

ვიდეორგოლები დღეიდან, 5 მაისიდან საზოგადოებრივის ეთერში უკვე გადის.

ჩანაწერები საზოგადოებრივის სტუდიებსა და სამუშაო ატმოსფეროში ყოველდღიურად კეთდება, 1500-ზე მეტ სტროფს, საზოგადოებისთვის ცნობილ სახეებთან ერთად, ნებისმიერი მსურველი წაიკითხავს.

საზოგადოებრივი მაუწყებლის გენერალური დირექტორის, ვასილ მაღლაფერიძის განცხადებით, ჟურნალისტებმა, პროდიუსერებმა და წამყვანებმა ძალიან საინტერესო ფორმას მიაგნეს და იმედია, პროცესში მაყურებელიც ჩაერთვება .

„ბუნებრივია, საზოგადოებრივი მაუწყებელი ჩაერთო რუსთაველის კვირეულში. ძალიან საინტერესო ფორმას მიაგნეს ჩვენმა ჟურნალისტებმა, პროდიუსერებმა და წამყვანებმა. იმედია გცაქვს, ეს ჩვენს მაყურებელს მოეწონება და თავადაც ჩაერთვება ამ პროცესში. „ის, რაც გვაერთიანებს“, - ეს ფრაზა ამავე დროს იქნება, საზოგადოებრივის სლოგანი, რადგან თავად საზოგადოებრივი მაუწყებელის არსი არის ის, რაც საზოგადოებას აერთიანებს. ჩვენ ვალდებული ვართ, ვისაუბროთ და პოპულარიზაცია გავუკეთოთ იმას, რაც ყველას გვაერთიანებს“, - აღნიშნა ვასილ მაღლაფერიძემ.

ვიდეორგოლების რეჟისორი კახა ბუხრაშვილი ამბობს, რომ დაგეგმილია მთელი პოემის ჩაწერა.

„ვაპირებთ, ჩავწეროთ მთელი „ვეფხისტყაოსანი“. დაახლოებით 800-მდე რგოლი უნდა მომზადდეს, დიდ მასშტაბს შევეჭიდეთ და იმედია, გამოგვივა“,-აღნიშნა ბუხრაშვილმა.

საზოგადოებრივი მაუწყებელი საქართველოს დამოუკიდებლობის დღეს - 26 მაისს დედაქალაქის მთავარ გამზირზე საკუთარ პავილიონს მოაწყობს და რუსთაველის კვირეულს ამ ფორმითაც შეუერთდება.

პავილიონის თითოეულ სტუმარს „ვეფხისტყაოსნიდან“ საყვარელი ფრაზის არჩევა და მისი ჩაწერა ადგილზე შეეძლება.

წლის ბოლოსთვის პოემა სრულად იქნება ჩაწერილი და „ვეფხისტყაოსნის“ ელექტრონული ვერსიაც იქნება მზად.

საზოგადოებრივი მაუწყებლის ბრენდისა და კომუნიკაციის სამსახურის უფროსის ნინა ნიკოგოსიანიის თქმით, ყველა ეს ჩანაწერი საზოგადოებრივის ვებგვერდზე აიტვირთება, ვიდეორგოლი, რომელსაც ყველაზე მეტი მოწონება და ნახვა ექნება, საზოგადოებრივი მაუწყებლისგან სპეციალური პრიზით დაჯილდოვდება.

ახალი კამპანია საზოგადოებრივზე მთელი წელი გაგრძელდება და რუსთაველის პოემის მოყვარულებს ერთ არხზე გააერთიანებს.