„​გამარჯვება სასიამოვნოა, მაგრამ არა მთავარი, დღეს გაიმარჯვებ, ხვალ არავის ახსოვხარ“, - საკუთარი წარმატების შესახებ საუბრისას აღნიშნა ევროვიზიის გამარჯვებულმა სალვადორ სობრალმა. პორტუგალიის წარმომადგენელმა მედიისთვის პრესკონფერენცია გამართა, სადაც განაცხადა, რომ ​მისთვის მთავარი სიმღერაა, ამიტომ აპირებს, მეორე ალბომზე იმუშაოს და საკონცერტო ტურნეც გამართოს. 

მომღერლის თქმით, ჰარმონიული მუსიკა სულ სხვაა, რომელსაც ბოლო დროს აღარ უსმენენ. მან აღნიშნა, რომ რადიოების მეშვეობით ადამიანებს ერთსა და იმავე სიმღერას მრავალჯერ ასმენინებენ, რათა ისინი მოაწონონ. ​სალვადორ სობრალის თქმით, ის ბედნიერი იქნება, თუკი ამ ყველაფერს შეცვლის, რაშიც და - ლუიზა დაეხმარება.

რიგით 62-ე ევროფესტივალის გამარჯვებული პორტუგალიის წარმომადგენელი სალვადორ სობრალი გახდა. სალვადორ სობრალმა საფინალო კონცერტის დასასრულს სიმღერა Amar Pelos Dois ამჯერად დასთან, ლუიზა სობრალთან ერთად შეასრულა. სიმღერის ავტორი სწორედ ლუიზა სობრალია. 

ცნობილია, რომ სალვადორ სობრალს გულის პრობლემები აქვს. იგი გულის გადანერგვის რიგში დგას და მისი ჯანმრთელობის მდგომაროება საკმაოდ რთულია. რეპეტიციების დროს კი, მას და ეხმარებოდა. 

უმაღლესი 12 ქულა პორტუგალიას შემდეგი ქვეყნების ჟიურიმ მისცა: შვედეთი, სან მარინო, ლატვია, ისრაელი, ესპანეთი, საფრანგეთი, ლიტვა, სომხეთი, ისლანდია, შვეიცარია, ჰოლანდია, საქართველო, უნგრეთი, ბულგარეთი, სლოვენია, პოლონეთი, დიდი ბრიტანეთი, ჩეხეთი. მაყურებელმა პორტუგალიას 376 ქულა მისცა, ჯამში კი, გამარჯვებულმა 758 ქულა დააგროვა.