გარემოსა და ბუნებრივი რესურსების დაცვის მინისტრი გიგლა აგულაშვილი პანკისის ხეობას სტუმრობდა, სადაც სოფელ დუისში, ხეობის ახალგაზრდებს შეხვდა და სამინისტროში მიმდინარე პროექტებზე ესაუბრა. პანკისელი ახალგაზრდები ექსპრესლაბორატორიის სამუშაო პროცესსაც გაეცნენ. სააგენტოს სპეციალისტებმა ადგილზე ჩაატარეს ჰაერის დაბინძურების კვლევები, ელ. მაგნიტური გამოსხივების და ხმაურის გაზომვები. მიღებული შედეგების მიხედვით სპეციალისტებმა ზღვრულად დასაშვებ ნორმებთან შესაბამისობა განსაზღვრეს.
დღესვე, სოფელ დუისში გამწვანების აქცია გაიმართა, რომელშიც მონაწილეობა გიგლა აგულაშვილმა მხარის გუბერნატორთან ირაკლი ქადაგიშვილთან და ადგილობრივ მოსახლეობასთან ერთად მიიღო. აქციის ფარგლებში, 300 -მდე წიწვოვანი (შავი ფიჭვი) და ფოთლოვანი სახეობის ნერგები დაირგო.