სასტუმრო „ტიფლის პალასში“ ეროვნული კონფერენცია - „რესურსეფექტური და სუფთა წარმოება საქართველოში“ გაიმართა. კონფერენციის მონაწილეებს გარემოსა და ბუნებრივი რესურსების დაცვის მინისტრმა გიგლა აგულაშვილმა მიმართა.
კონფერენცია ევროკავშირის მიერ დაფინანსებული პროგრამის - „მწვანე ეკონომიკის განვითარება ევროკავშირის აღმოსავლეთ სამეზობლოში“ ფარგლებში გაიმართა, რომელიც ეხმარება ევროკავშირის აღმოსავლეთ პარტნიორობის 6 ქვეყანას (საქართველო, სომხეთი, აზერბაიჯანი, ბელარუსი, მოლდავეთი და უკრაინა) მწვანე ეკონომიკაზე გადასვლის პროცესის დაჩქარებაში. პროექტს ევროკავშირთან ერთად აფინანსებს ავსტრიის განვითარების ბანკი და სლოვენიის მთავრობა.
შეხვედრაზე პროგრამის ფარგლებში 2013-2017 წწ. მიღწეული შედეგები წარმოადგინეს მცირე და საშუალო ზომის სამრეწველო საწარმოებში წარმოების პროდუქტიულობის გაზრდის და გარემოს დაცვის საქმიანობის გაუმჯობესების კუთხით.
პროგრამას ერთობლივად ახორციელებენ საერთაშორისო პარტნიორი ორგანიზაციები: ეკონომიკური თანამშრომლობისა და განვითარების ორგანიზაცია (OECD), გაეროს ევროპის ეკონომიკური კომისია (UNECE), გაეროს გარემოს დაცვის პროგრამა ( UN Environmet) და გაეროს ინდუსტრიული განვითარების ორგანიზაცია (UNIDO).
კონფერენციას ეკონომიკისა და მდგრადი განვითარების სამინისტროს წარმომადგენლები, ბიზნესსექტორის, არასამთავრობო ორგანიზაციების, ასევე საქართველოში ევროკავშირის დელეგაციის, გაეროს ინდუსტრიული განვითარების ორგანიზაციის და სხვა საერთაშორისო ორგანიზაციების წარმომადგენლები ესწრებოდნენ.