დღემდე გაუხმაურებელი შემზარავი გარემოებები რეზონანსული საქმიდან. ცემა, დამამცირებელი მოპყრობა, მუქარა იარაღის გამოყენებით, შანტაჟი-ეს არის ფრაგმენტები ყოფილი პრეზიდენტის პირადი ფოტოგრაფის დღევანდელი ჩვენებიდან.
2011 წელს ჯაშუშობის ბრალდებით დაკავებულმა ირაკლი გედენიძემ ამჯერად სასამართლო დარბაზში გაიხსენა, როგორ აიძულეს აღიარებითი ჩვენების მიცემა.
როგორც დღეს გახდა ცნობილი, საგამოძიებო უწყებამდე გედენიძეზე ჯერ სასაფლაოს ტერიტორიაზე იძალადეს. დაზარალებულმა ამხილა განსასჯელის სკამზე მჯდომი კონტრდაზვერვის სამსახურის უფროსის ყოფილი მოადგილეც, რომელმაც ჩვენება უკომენტაროდ მოისმინა.
ფოტორეპორტიორმა დაკავება 26 მაისის აქციის ამსახველი ფოტოების გავრცელებას დაუკავშირა და თქვა, რომ თავის დროზე ეს ვერსია ირმა ნადირაშვილის ფრაზამაც გაუმყარა.
გედენიძემ დღეს ასევე პირველად თქვა, რომ 2008 წლის ომის დროს ჯაშუშობის აღიარებასაც აიძულებდნენ.