ახმეტაში, მშენებარე ეკლესიასთან ალავერდის ეპარქიის მრევლთან ერთად ადგილობრივი მოსახლეობაა შეკრებილი. ისინი მშვიდობიან საპროტესტო აქციას, ერთი კვირის წინ პანკისის ხეობაში, სოფ.ჯოყოლოში მშენებარე სალოცავის დანგრევასთან დაკავშირებით მართავენ. მომხდარ ფაქტთან დაკავშირებით სისხლის სამართლის 187-ე მუხლით დაწყებულია გამოძიება, რაც სხვისი ქონების განზრახ დაზიანებას გულისხმობს.
მოსახლეობა არ გამორიცხავს, რომ მსგავსი ქმედება პროვოკაციულია და რელიგიური შუღლის და დაპირისპირების გაღვივებას ისახავდეს მიზნად. მათი თქმით, მსგავსი ფაქტების მიმართ განსაკუთრებული ყურადღება მართებს სახელმწიფო უშიშროების სამსახურებს. აქციის მონაწილეები ამ წუთებში ალავერდის მიტროპოლიტს აბბა დავითს (მახარაძე) და პარლამენტის მაჟორიტარ დეპუტატს გელა სამხარაულს ელოდებიან.