საზოგადოებრივი მაუწყებლის საკონკურსო კომისია იმ 153 პროექტის განხილვას იწყებს, რომელიც საზოგადოებრივი მაუწყებლის მიერ გადაცემების შერჩევის კონკურსის ფარგლებში შემოვიდა.

კომისიის წევრებმა მაუწყებლის გენერალურ დირექტორთან დღეს სამუშაო შეხვედრა გამართეს და იმ მთავარ კრიტერიუმებზე იმსჯელეს, რომელთა მიხედვითაც კომისიის წევრები იხელმძღვანელებენ, მთავარ კრიტერიუმად საზოგადოებისთვის საინტერესო გადაცემების შერჩევა დასახელდა.

12 კაციანმა საკონკურსო კომისიამ, საიდანაც 4 მოწვეული ექსპერტია სწორედ ამ განაცხადებიდან უნდა შეარჩიოს იმ გადაცემების პროექტები, რომლებიც უკვე მეორე და მესამე ეტაპზე გადავლენ.

მეორე ტური პროექტის ავტორებთან გასაუბრებას გულისხმობს. ვინც კომისიასთან გასაუბრებასაც წარმატებით გაივლის ავტომატურად გადავა მესამე ეტაპზე, რაც პროექტების საპილოტე ვერსიების დამზადებას მოიცავს.

საკონკურსო კომისია 5 მაისს შეიკრიბება. არ არის გამორიცხული კონკურსის ვადებმა რამდენიმე დღით გადაიწიოს, ამის მიზეზად კომისიის წევრები პროექტების რაოდენობას ასახელებენ და ამბობენ, რომ თითოეული პროექტის საფუძვლიანად განხილვისთვის შესაბამისი დროა საჭირო.

დაინტერესებულ პირებს წარდგენილი გადაცემების, განცხადებებისა და ავტორების სიის ნახვა უკვე შეუძლიათ საზოგადოებრივი მაუწყებლის ოფიციალურ ვებგვერდზე.