21 აპრილი, 2017
•ერთი პოლიციელი დაიღუპა და ორი მძიმედ დაიჭრა გვიან ღამით ელისეის სასახლესთან მომხდარი სროლის შედეგად.
•პარიზში მყოფი საქართველოს მოქალაქეებისთვის საგარეო საქმეთა სამინისტრომ ცხელი ხაზის ნომრები გამოაქვეყნა.
•მმართველმა გუნდმა საკონსტიტუციო ცვლილებების პროექტთან დაკავშირებით დახურული სხდომა გამართა. შეხვედრაზე საუბარი რამდენიმე საკითხს შეეხო, მათ შორის პრეზიდენტის არჩევის წესს და მაჟორიტარული სისტემიდან პროპორციულზე გადასვლის საკითხს.
•მმართველი გუნდი პრეზიდენტს პასუხობს. საპარლამენტო უმრავლესობაში საკონსტიტუციო ცვლილებებთან დაკავშირებით გიორგი მარგველაშვილის კრიტიკაზე გაკვირვებას გამოხატავენ.
•კონსტიტუციაში შესატანი ცვლილებების პროექტს საკონსტიტუციო კომისია კენჭს ხვალ უყრის.
•როგორ უნდა განისაზღვროს პოლიტიკური პარტიების დაფინანსების საკითხი - ამ თემაზე დღეს არასმთავრობო ორგანიზაციები 15 კვალიფიციურ სუბიექტს საკუთარ წინადადებებს გააცნობენ.
•ფონიჭალაში დედა-შვილის მკვლელობის საქმეზე ნაფიცმა მსაჯულებმა გამამტყუნებელი ვერდიქტი გამოიტანეს. გადაწყვეტილება მსაჯულებმა 10 ხმით 2-ის წინააღმდეგ მიიღეს.
•საქალაქო სასამართლო დავით ხარშილაძის საქმესთან დაკავშირებით განცხადებას ავრცელებს. სასამართლოს ადმინისტრაციულ საქმეთა კოლეგია სამართალდარღვევის ოქმის განხილვას 4 მაისს განაახლებს, პროცესი გუშინ დაიწყო.
•საკანონმდებლო ორგანო ,,საგზაო მოძრაობის შესახებ“ საკანონმდებლო პაკეტზე მუშაობას ასრულებს.
•დღეს პარლამენტი ნარკოპოლიტიკის შესახებ მომზადებულ კანონპროექტს განიხილავს. ცვლილებებათა პაკეტი მმართველმა გუნდმა მოამზადა და ის ლიბერალური ნარკოპოლიტიკის შექმნას ისახავს მიზნად.
•საკანონმდებლო ორგანოში თამარ ქალდანს მოუსმინეს. პერსონალურ მონაცემთა დაცვის ინსპექტორმა დეპუტატებს უწყების 2016 წლის საქმიანობის ანგარიში და რეკომენდაციები გააცნო.
•ახალგაზრდა იურისტთა ასოციაცია ცენტრალური საარჩევნო კომისიის საკანონმდებლო წინადადებას აკრიტიკებს.
•ვენესუელაში მასობრივი საპროტესტო გამოსვლების დროს პოლიციასა და აქციის მონაწილეებს შორის მომხდარი დაპირისპირების შედეგად 223 ადამიანი დაშავდა.
•ევროპარლამენტის პრეზიდენტი ანტონიო ტაიანი ამბობს, რომ ევროკავშირიდან ბრიტანეთის გასვლის პროცესი შესაძლოა შეჩერდეს, იმ შემთხვევაში თუ დაგეგმილ არჩევენებზე ბრიტანელები ახალ მთავრობას აირჩევენ.
•წალენჯიხის რაიონის სოფელ სქურში ფერისცვალების ტაძრის გვერდითა მინაშენების საკონსერვაციო სამუშაოები მიმდინარეობს. სამუშაოებს ადგილზე კულტურული მემკვიდრეობის დაცვის ეროვნული სააგენტოს დირექტორი გაეცნო.
•დედაქალაქის მუზეუმების ჩამონათვალს “სმირნოვების მუზეუმი” შეემატა. გალაქტიონ ტაბიძის 20 ნომერში, სმირნოვების ყოფილ სახლში სამუზეუმო კოლექცია უკვე განთავსდა. სმირნოვების სახლში დაცულია მნიშვნელოვანი კულტურული მემკვიდრეობის ფერწერული ნიმუშები, მათ შორის მე-18, მე-19-ე საუკუნის კოლექციები.
•23 აპრილს მსოფლიო წიგნის საერთაშორისო დღეს აღნიშნავს. ამ დღესთან დაკავშირებით საქართველოს წიგნის გამომცემელთა და გამავრცელებელთა ასოციაციის ორგანიზებით თბილისის სახელმწიფო უნივერსიტეტში სხვადასხვა ღონისძიება გაიმართება.
•დედამიწის საერთაშორისო დღესთან დაკავშირებით, ბაგა-ბაღების აღსაზრდელებმა სტუმრებისთვის აქცია-პერფომანსი წარმოადგინეს.
•სამხატვრო გალერეა “აჰუნდო ჰაუსმა” ნახატების გამოფენას უმასპინძლა. გამოფენა, რომლის სახელწოდებაა “ნუშობა” გუშინ გაიხსნა და 10 მაისამდე გაგრძელდება.
•თბილისის მოდის კვირეულის მორიგი სეზონი დაიწყო.