მოსკოვში, ვნუკოვოს აეროპორტში მომხდარი ინციდენტი მფრინავის მხრიდან დაშვებულ შეცდომას უკავშირდება,- ამის შესახებ საზოგადოებრივს ავიაკომპანია „ჯორჯიან ეარვეისის“ პრესსამსახურში განუცხადეს.
მათი ინფორმაციით, თვითმფრინავი, რომელიც რეისს თბილისიდან - მოსკოვის მიმართულებით ასრულებდა, სამიმოსვლო ბილიკიდან გადავიდა.
ავიაკომპანიაში აცხადებენ, რომ ეს არ ყოფილა ავარიული დაშვება და შემთხვევა პილოტის გაუფრთხილებლობის გამო მოხდა.
„ჯორჯიან ეარვეისი“ ინციდენტის შემდეგ შესაბამისი ზომების მიღებას აპირებს.
„ეს არ იყო ავარიული სიტუაცია, პილოტის მხრიდან იყო დაშვებული შეცდომა, შემთხვევა მისი გაუფრთხილებლობის ბრალი იყო. კომპანია შესაბამის ზომებს მიიღებს.
სამიმოსვლო ბილიკიდან გადავიდა თვითმფრინავი და არა ასაფრენ-დასაფრენი ბილიკიდან. პილოტს ბოინგი მოუსრიალდა და ბორბალი ტალახში ჩაეფლო. მგზავრების ევაკუაცია დროულად მოხდა. თვითმფრინავის ბორბალი ტექნიკურ შემოწმებაზე გადაიტანეს“,- განაცხადეს ავიაკომპანიაში.
რაც შეეხება მოსკოვი-თბილისის რეისს, რომელიც ამავე თვითმფრინავს უნდა შეესრულებინა, „ჯორჯიან ეარვეისის“ პრესსამსახურის ინფორმაციით, აღნიშნული რეისი სხვა ბოინგმა შეასრულა, რომელიც ინციდენტის შემდეგ თბილისიდან შვიდი საათის დაგვიანებით გამოფრინდა.
ავიაკომპანია „ჯორჯიან ეარვეისის“ თვითმფრინავი, რომელიც თბილისი-მოსკოვის რეისს ასრულებდა, მოსკოვის ვნუკოვოს აეროპორტში დაჯდომისას, სამიმოსვლო ბილიკიდან გადავიდა და მიწის მასაში ნაწილობრივ ჩაეფლო.
ბორტზე 107 ადამიანი იმყოფებოდა და მათგან არავინ დაშავებულა.