თურქეთის რეფერენდუმის შედეგები საქართველოდან უკვე ცნობილია - საქართველოში გახსნილი ორი უბნის მონაცემებით, თურქეთის რეფერენდუმში მონაწილეთა 59.3%-მა საკონსტიტუციო ცვლილებებს მხარი არ დაუჭირა.

საარჩევნო უბნები თბილისში, თურქეთის საელჩოსა და ბათუმში, თურქეთის საკონსულოში იყო გახსნილი.

ხმების 100%-ი უკვე დათვლილია.

საქართველოში თურქეთის 416-მა მოქალაქემ (59.3%-მა) საკონსტიტუციო ცვლილებებს მხარი არ დაუჭირა, 285-მა კი (40.7%) რეფერენდუმზე დასმულ კითხვას დადებითად უპასუხა.

სულ რეფერენდუმში მონაწილეობა 711-მა მოქალაქემ მიიღო (1789-იდან), აქედან, 10 ხმა გაბათილდა.

სხვადასხვა ქვეყენაში, მათ შორის საქართველოში გახსნილი საარჩევნო უბნის შედეგებს თურქული გამოცემა yenisafak-ი აქვეყნებს.

თურქეთში საარჩევნო ბიულეტენების 100 %-ია დათვლილი. წინასწარი შედეგებით, საკონსტიტუციო ცვლილებებს რეფერენდუმში მონაწილეთა 51,18 % უჭერს მხარს, 48,82 % კი წინააღმდეგია.

ქვეყნის პრეზიდენტმა, რეჯეფ თაიფ ერდოღანმა უკვე მიმართა მოსახლეობას და რეფერენდუმის შედეგებს ისტორიული უწოდა.

იმ შემთხვევაში, თუ ხმების სრულად დათვლის შემდეგ აღმოჩნდა, რომ რეფერენდუმში მონაწილეთა უმრავლესობამ სარეფერენდუმო შეკითხვას დადებითად უპასუხა, რეჯეფ თაიფ ერდოღანს საშუალება მიეცემა, ქვეყანას 2029 წლამდე უხელმძღვანელოს.

საკონსტიტუციო ცვლილებების მომხრეები ფიქრობენ, რომ მმართველობის ახალი ფორმა ქვეყნის მოდერნიზებას შეუწყობს ხელს და რეფორმების პროცესს დააჩქარებს.

მოწინააღმდეგეები კი ვარაუდობენ, რომ ცვლილებები ხელისუფლების ძალაუფლებას გაზრდის.

თუ მოქალაქეები კონსტიტუციის ცვლილებას დათანხმდებიან, პრეზიდენტის უფლებამოსილება ფართოვდება. კერძოდ;

1. პრეზიდენტს უფლება ეძლევა პირდაპირ დანიშნოს უმაღლესი სახელმწიფო თანამდებობის პირები, მათ შორის მინისტრები;

2. მას უფლება ეძლევა დანიშნოს ერთი ან რამდენიმე ვიცე-პრეზიდენტი;

3. უქმდება პრემიერ-მინისტრის თანამდებობა;

4. პრეზიდენტს უფლება ექნება ჩაერიოს სასამართლო სისტემის საქმიანობაში;

5. პრეზიდენტი გადაწყვეტს, გამოაცხადოს თუ არა ქვეყანაში საგანგებო მდგომარეობა.