მარჯანიშვილის თეატრში გივი ბერიკაშვილის სამოქალაქო პანაშვიდი მიმდინარეობს.

გარდაცვლილის ოჯახს პრემიერ-მინისტრმა გიორგი კვირიკაშვილმა მეუღლესთან ერთად მიუსამძიმრა. ოჯახს მიუსამძიმრეს მთავრობის წევრებმა, დეპუტატებმა, სხვადასხვა პოლიტიკური ძალის წარმომადგენლებმა, კულტურის სფეროს მოღვაწეებმა და მოქალაქეებმა მიუსამძიმრეს. მარჯანიშვილის თეატრში მივიდა ყოფილი პრემიერი, ბიძინა ივანიშვილი.

გივი ბერიკაშვილს დღეს, საბურთალოს ამაღლების ეკლესიის ეზოში 15:00 საათზე დაკრძალავენ.

ქართული კინოსა და თეატრის მსახიობი გივი ბერიკაშვილი 83 წლის ასაკში 10 აპრილს გარდაიცვალა.

ცნობილი ქართველი მსახიობი ფილტვებზე არსებული პრობლემებით საავადმყოფოში რამდენიმე დღის წინ გადაიყვანეს და მართვით სუნთქვაზე იმყოფებოდა.

გივი ბერიკაშვილი 1933 წლის 12 მაისს გურჯაანის სოფელ კოლაგში დაიბადა. 1956 წელს დაამთავრა თეატრალური ინსტიტუტის სამსახიობო ფაკულტეტი.

სხვადასხვა დროს მუშაობდა რუსთავის სახელმწიფო დრამატულ თეატრში, სოხუმის სახელმწიფო დრამატულ თეატრში და კოტე მარჯანიშვილის სახელობის თეატრში. იყო საქართველოს დამსახურებული არტისტი, საქართველოს სახალხო არტისტი, კოტე მარჯანიშვილის სახელობის პრემიის ლაურეატი, იპოლიტე ხვიჩიას სახელობის პრემიის ლაურეატი, წლის საუკეთესო მამაკაცის პრემიის ლაურეატი.