„მე არ მომიწოდებია დაშლისკენ, ვხედავდი საშიშროებას და მოვუწოდე, რომ შესულიყვნენ ქაშუეთის წმინდა გიორგის ეკლესიაში“, - ამის შესახებ სრულიად საქართველოს კათოლიკოს-პატრიარქმა საკვირაო ქადაგებისას, 9 აპრილის მოვლენებზე საუბრისას.

„დღეს არის 9 აპრილი, მწუხარების დღე, მაგრამ ამავე დროს, სიხარულის დღე. ახალგაზრდებმა გამოიჩინეს დიდი გმირობა. დღეს მოვისმინე რადიოში, რომ თითქოს საქართველოს კათოლიკოს-პატრიარქმა მოუწოდა დაშლისკენ, თუმცა მე არ მომიწოდებია დაშლისკენ, ვხედავდი საშიშროებას და მოვუწოდე, რომ შესულიყვნენ ქაშუეთის წმინდა გიორგის ეკლესიაში. ღმერთმა ნათელში ამყოფოს ის ადამიანები“, - განაცხადა საქართველოს კათოლიკოს-პატრიარქმა.

ილია მეორე დღეს დილით 9 აპრილის მემორიალთანაც იმყოფებოდა, სადაც 28 წლის წინ გარდაცვლილთა სულების მოსახსენიებელი პანაშვიდი გადაიხადა.

1989 წლის 9 აპრილის ტრაგედიიდან 28 წელი გავიდა. 1989 წლის 9 აპრილს, გამთენიისას, საბჭოთა კავშირის შეიარაღებული ძალების ნაწილებმა თბილისის ცენტრში, პარლამენტის შენობასთან მშვიდობიანი საპროტესტო აქცია დაარბიეს, რასაც ადამიანთა მსხვერპლი მოჰყვა. დარბევის შედეგად, 21 ადამიანი დაიღუპა, ხოლო ათასობით მოქალაქე დაუდგენელი შემადგენლობის გაზით მოიწამლა. მოგვიანებით, 1991 წლის 9 აპრილს კი უზენაესმა საბჭომ საქართველოს სახელმწიფოებრივი დამოუკიდებლობის აღდგენა გამოაცხადა.