რუსეთი დიდ მნიშვნელობას ანიჭებს საფრანგეთთან ურთიერთობებს და არანაირად არ სურს ქვეყნის საპრეზიდენტო არჩევნებზე გავლენის მოხდენა. ამის შესახებ რუსეთის პრეზიდენტმა, ვლადიმერ პუტინმა საფრანგეთის ულტრამემარჯვენე პარტია “ეროვნული ფრონტის” ლიდერ მარინ ლე პენთან მოსკოვში გამართულ შეხვედრაზე განაცხადა.
„ჩვენ დიდ მნიშვნელობას ვანიჭებთ საფრანგეთთან ურთიერთობებს. ამავდროულად ვცდილობთ თანაბარი ურთიერთობები გვქონდეს როგორც მოქმედი ხელისუფლების, ასევე ოპოზიციის წარმომადგენლებთან“, - განაცხადა რუსეთის პრეზიდენტმა.
ვლადიმერ პუტინმა აღნიშნა, რომ საფრანგეთში ახლა წინასაარჩევნო კამპანია აქტიურად მიმდინარეობს. საფრანგეთის “ეროვნული ფრონტის” ლიდერი მოსკოვში სახელმწიფო დუმის მიწვევით იმყოფება. მან შეხვედრები სათათბიროს სპიკერთან და დეპუტატებთან უკვე გამართა.