სირიის სამთავრობო ძალებსა და მეამბოხეებს შორის საბრძოლო მოქმედებები განახლდა.
ალ-ნუსრას ფრონტის დაჯგუფების წევრებთან ერთად, მეამბოხე ძალებმა ქალაქის მიმართულებით კვირას, ღამით, საარტილერიო ცეცხლი გახსნეს.
სამთავრობო პოზიციებზე იერიში ჯობარის რაიონში ორი დანაღმული ავტომობილის აფეთქებით დაიწყო.
სირიის შეიარაღებულმა ძალებმა შეტევას ავიაიერიშით უპასუხეს. პარალელურად, სირიის ხელისუფლებას ისრაელი საზენიტო-სარაკეტო დანადგარების განადგურებით ემუქრება, იმ შემთხვევაში თუ დამასკო მათ ისრაელის თვითმფრინავების წინააღმდეგ კვლავ გამოიყენებს.
საქმე ეხება 17 მარტს მომხდარ ინციდენტს, რომლის დროსაც, სირიის საჰაერო სივრცეში შეჭრილ ისრაელის სამხედრო თვითმრინავს სირიის არმიამ ცეცხლი გაუხსნა.
სირიაში შეჭრილ ისრაელის ავიაგამანადგურებელს ასადის მხარდამჭერი ტერორისტული ორგანიზაცია ჰეზბოლასთვის შეიარაღების გადაცემის პროცესის დაბლოკვა სურდა.
სირიაში განხორციელებული სამხედრო ოპერაციის გამო, რუსეთის საგარეო საქმეთა სამინისტროში ისრაელის ელჩი დაიბარეს.