ბათუმი 2004 წლის გაზაფხულის მოვლენების შემდეგ ყველაზე მასშტაბური მღელვარების იარებს იშუშებს.
მძღოლსა და საპატრულო პოლიციას შორის მომხდარი ინციდენტი ჯერ საპროტესტო აქციაში გადაიზარდა, შემდეგ კი პროცესმა ძალადობრივი განვითარება ჰპოვა.
ათობით დაშავებული მოქალაქე და სამართალდამცველი, დამწვარი მანქანები, დაზიანებული ინფრასტრუქტურა, ქვები, ცრემლსადენი აირი, აალებადი სითხით სავსე ბოთლები, რეზინის ტყვიები,- ეს სულ რამდენიმე საათის წინ განვითარებული სამწუხარო რეალობაა.
რამ გამოიწვია არეულობა ბათუმის ქუჩებში? კითხვაზე პასუხი გამოძიებამ უნდა გასცეს. სისხლის სამართლის საქმე აღძრულია. მანამდე კი ისმის პოლიტიკური ურთიერთბრალდებები. ხელისუფლება ოპოზიციურ ძალებს დესტრუქციულ ქმედებებში ადანაშაულებს, ოპოზიცია კი მოქმედებისა თუ უმოქმედობის გამო, მმართველი გუნდის პასუხისმგებლობაზე საუბრობს.
კითხვები არსებობს, რომლებზეც პასუხების გაცემას ველოდებით. მთელი მომდევნო ერთი საათის განმავლობაში, ვეცდებით, მოგაწოდოთ ის ინფორმაცია, რომელიც ანალიზის გაკეთებაში დაგვეხმარება.
ჩვენს შეკითხვებს უპასუხებს შინაგან საქმეთა მინისტრი. პირდაპირ ეთერს დავუთმობთ საპარლამენტო ოპოზიციისა და უმრავლესობის წევრებს.
ასევე, ბათუმში განვითარებული თუ მიმდინარე პროცესების შესახებ ჩვენი კორესპონდენტები ისაუბრებენ.
სალომე ქოქიაშვილთან ერთად შევაჯამებთ გასულ დღეს.