„საყდრისის დაცვის კომიტეტის“ განცხადებით ოქროს მოპოვებითი სამუშაოების განხორციელების შემთხვევაში, მეცამეტე საუკუნის კულტურული მემკვიდრეობის ძეგლი ფიტარეთი შესაძლოა განადგურდეს.
კომიტეტის წევრების ინფორმაციით, ფიტარეთის მიმდებარე ტერიტორიაზე ოქროს მოპოვებითი სამუშაოების დაწყებას კომპანია "არ-ემ-ჯი გოლდი" გეგმავს.
მათი განცხადებით, გასული წლის სექტემბერში ხრამის ხეობაში, სადაც ფიტარეთის გარდა, კიდევ არაერთი ძეგლია განთავსებული, გეოლოგიურ დაზვერვით სამუშაოებს კომპანია "სი-ემ-ჯის" კუთვნილი ტექნიკა აწარმოებდა, რომელიც ამავე დროს კომპანია "არ-ემ-ჯი გოლდის" მეპატრონეს ეკუთვნის.
საყდრისის კომიტეტმა 10 ოქტომბერს სამუშაოების შესწავლასთან დაკავშირებით წერილით კულტურული მემკვიდრეობის დაცვის სააგენტოსაც მიმართა.
"მოამბესთან" სატელევიზო კომენტარს არ აკეთებენ კომპანია "სი-ემ-ჯის" წარმომადგენლები, თუმცა სატელეფონო საუბარში მათ აღნიშნეს, რომ ძეგლიდან მოშორებით მხოლოდ გეოლოგიური შესწავლითი სამუშაოები მიმდინარეობდა და გადაწყვეტილება ამ ეტაპზე მიღებული არ არის.
კულტურული მემკვიდრეობის დაცვის სააგენტოს ხელმძღვანელი კი ამბობს, იმ შემთხვევაში, თუ სამუშაოები დაიწყება მონიტორინგს გაუწევენ, რათა ძეგლები არ დაზიანდეს.