გრძელდება საკალათბურთო ევროლიგის გათამაშება. გარკვეული პაუზის შემდეგ, მოედანს დაუბრუნდა თორნიკე შენგელია.

ქართველი ფორვარდი თავის კლუბს "ბასკონიას" გუშინ 11 ქულით დაუბრუნდა. "მილანთან" მოგებულ შეხვედრაში მან 17 წუთი ითამაშა და 11 ქულას 2 მოხსნა და ერთი შედეგიანი გადაცემაც მიამატა.

"ბასკონიელებმა" შეხვედრა ანგარიშით 87-74 მოიგეს. გამარჯვებულთა რიგებში ყველაზე მეტი, 18 ქულა ფრანგმა ფორვარდმა კიმ ტილიმ ჩააგდო. ამ მოგების შემდეგ "ბასკონიას" 13 მოგება და 11 მარცხი დაუგროვდა და სატურნირო ცხრილში მეშვიდე ადგილზე იმყოფება.

მომდევნო ტურში ბასკური კლუბი სტუმრად სტამბოლის "ფენერბახჩეს" დაუპირისპირდება.