პროგრამის „წყალდიდობების მართვის თანამედროვე მეთოდები საქართველოში“ შედეგები სასტუმრო „ქორთიარდ მარიოტში“ შეაჯამეს. შეხვედრის მონაწილეებს გარემოსა და ბუნებრივი რესურსების დაცვის მინისტრის მოადგილემ ეკატერინე გრიგალავამ, გაეროს განვითარების პროგრამის (UNDP) ხელმძღვანელის მოადგილემ საქართველოში შომბი შარპმა და გარემოს ეროვნული სააგენტოს უფროსმა თამარ ბაგრატიამ მიმართეს. მხარეებმა UNDP/AF პროექტის „წყალდიდობებისა და წყალმოვარდნების მართვის კლიმატისადმი მედეგი პრაქტიკის შემუშავება მოწყვლადი მოსახლეობის დასაცავად საქართველოში“ ხუთწლიანი შედეგები შეაჯამეს, რომელიც მიზნად ისახავს წყალდიდობებისა და წყალმოვარდნების მართვის თანამედროვე მეთოდების დანერგვას საქართველოში. წყალდიდობებისა და წყალმოვარდნების რისკების მართვის ხელშეწყობის ინიციატივა განხორციელდა 2012 – 2016 წლებში ადაპტაციის ფონდისა და გაეროს განვითარების პროგრამის (UNDP) ფინანსური ხელშეწყობით. პროგრამის ბიუჯეტი 5 მილიონ აშშ დოლარს შეადგენს. პროგრამის განხორციელებამ ხელი შეუწყო წყალდიდობისადმი მედეგობის გაზრდას მდინარე რიონის აუზში, რომელიც ამ მხრივ ერთერთი ყველაზე მაღალი რისკის ზონაა საქართველოში. ნაპირსამაგრი სამუშაოები ჩატარდა ექვსს მუნიციპალიტეტში - სამტრედიაში, წყალტუბოში, ონში, ცაგერში, ლენტეხსა და ამბროლაურში. მაღალი რისკის შემცველ ათ მონაკვეთზე აიგო ნაპირდამცავი ნაგებობები. 12 ჰექტარზე გაშენდა აგრო-ტყე მდინარის ნაპირების ეროზიისა და წარეცხვისგან დასაცავად, ამოქმედდა ადრეული გაფრთხილების სისტემა. შესაძლებელი გახდა რიონის აუზის მდინარეებში წყლის დონისა და კლიმატური პირობების 24-საათიანი დაკვირვება. გარდა ამისა, გაეროს განვითარების პროგრამისა (UNDP) და ადაპტაციის ფონდის ხელშეწყობით შემუშავდა დატბორვის ტერიტორიების ზონირების პოლიტიკის დოკუმენტი, რომელიც განსაზღვრავს, თუ რა სახის საქმიანობა შეიძლება განხორციელდეს მოცემული რისკის ზონებში. ჩატარდა წყალდიდობებით გამიოწვეული შესაძლო ზარალის სოციო-ეკონომიკური ანალიზი რიონის აუზის 18 მუნიციპალიტეტისათვის. შემუშავდა წყალდიდობისაგან დაზღვევის ამინდის ინდექსზე დაფუძნებული სქემა. პროგრამის ფარგლებში განხორციელდა მდინარე რიონის ტოპოგრაფიული შესწავლა და ჰიდრომეტეოროლოგიური საფრთხეების კვლევა. შეიქმნა მეწყერებისა და დატბორვის დეტალური რუკები. ღონისძიებას საქართველოს მთავრობის, პარლამენტის, ადგილობრივი ხელისუფლების, კერძო სექტორისა და სამოქალაქო საზოგადოების წარმომადგენლები ესწრებოდნენ.