საგარეჯოს რაიონის სოფელ იორმუღანლოს, დუზაგრამისა და ლამბალოს მოსახლეობის იმ ნაწილმა, ვისაც ბანკებიდან იპოთეკური სესხი აქვთ აღებული, დღეს საპროტესტო აქცია გამართეს.
როგორც ისინი აცხადებენ, ბანკებმა მეცხოველეობის განვითარებისთვის სესხები ააღებინეს, გარკვეული პერიოდის შემდეგ კი პროცენტი მოუმატეს.
აქციის მონაწილეების განცხადებით, ბანკის კრედიტით მაღალ ფასად ნაყიდი ცხვრის რეალიზაცია მოსახლეობას ინვესტორების შემცირების გამო დაბალ ფასში მოუწია, რაც კომერციულად წამგებიანი აღმოჩნდა და კრედიტის დაფარვას ვეღარ ახერხებენ.
მათივე თქმით, ამის შედეგად, ბანკმა რამდენიმე იპოთეკარს უკვე გაუყიდა საცხოვრებელი სახლი, ათეულობით სახლი კი აუქციონზეა გატანილი.
მოქალაქეები შექმნილი ვითარების გამო, მეცხვარეობის დარგის განადგურებას პროგნოზირებენ.
აქციის მონაწილეები მიმართავენ ხელისუფლებას დაარეგულიროს საბანკო სისტემაში არსებული კაბალური სიტუაცია, მოხდეს კრედიტის გადაუხდელობის გამო დარიცხული პროცენტის ჩამოწერა და არსებული ვალის რესტრუქტურიზაცია. წინააღმდეგ შემთხვევაში, აქციის მონაწილეები თბილისში ჩასვლას და კანცელარიასთან საპროტესტო აქციის გამართვას გეგმავენ.