მოუწესრიგებელი, საცხოვრებელ პირობებთან შეუსაბამო შენობა, რომელიც დევნილების ერთადერთი თავშესაფარია და ისიც დღემდე დაუკანონებელი - სწორედ ამ პრობლემაზე ამახვილებენ ყურადღებას ვაშლიჯვარში მცხოვრები დევნილები.
მათ "ერთიანი ნაციონალური მოძრაობის" წარმომადგენლები ნუგზარ წიკლაური და ბესო შენგელია შეხვდნენ.
როგორც დევნილები აღნიშნავენ, მათი საცხოვრებელი ფართი დაუკანონებელია, რაზეც არაერთხელ მიმართეს შესაბამის სამსახურებს, თუმცა 5 წლის განმავლობაში რეაგირება არავის მოუხდენია.
მათივე თქმით, მზად არიან საკუთარი სახსრებით მოაწესრიგონ შენობა, თუკი საკუთრებაში გადაეცემათ, მაგრამ არც ქალაქ თბილისის მერია და არც ლტოლვილთა და განსახლების სამინისტრო ამ მხრივ ყურადღებას არ იჩენს.
აღსანიშნავია, რომ წინასაარჩევნოდ ქ. თბილისის მერი დავით ნარმანია დევნილთა კომპაქტურ ჩასახლებაში იმყოფებოდა და მათ შენობის დაკანონებას დაჰპირდა, თუმცა დაპირება არ შეასრულა.