გივი თარგამაძეს მისი მანქანის აფეთქების საქმის მასალები გააცნეს. ,,ევროპული საქართველოსთვის” წევრი თბილისის პროკურატურაში საკუთარი ინიციატივით მივიდა.

საგამოძიებო უწყების დატოვების შემდეგ თარგამაძე ამბობს, რომ კითხვები ბრალდებულ დავით ხეჩიაშვილის ადგილმდებარეობასთან დაკავშირებით ამ დრომდე აქვს, მას აინტერესებს, გადალახა თუ არა ბრალდებულმა საქართველოს საზღვარი.

თარგამაძე და მისი ადვოკატი აფეთქების საქმეზე დაკავებული ბორის ჩაგუნავას გათავისუფლებასაც აპროტესტებენ.

ის ასაფეთქებელი ნივთიარების და ცეცხლსასროლი იარაღის უკანონო შეძენა-შენახვაში იყო ბრალდებული, თუმცა სასამართლომ პატიმრობა პირობითი მსჯავრით შეუცვალა. გადაწყვეტილებას პროკურატურაც ასაჩივრებს.