ბათუმისა და ლაზეთის მიტროპოლიტი დიმიტრი (შიოლაშვილი), რომელიც ბერლინში იმყოფება, საზოგადოებრივთან საუბრისას საპატრიარქოში მიმდინარე მოვლენებთან დაკავშირებით კომენტარს არ აკეთებს. 

მისი თქმით, განცხადება დეკანოზ გიორგი მამალაძის დაკავებასთან დაკავშირებით მან ინტერნეტის მეშვეობით უკვე გააკეთა. 

„მე ვერაფერს ვფიქრობ, იმიტომ ვარ გერმანიაში თქვენთან ერთად. რა ინფორმაციაც გაქვთ თქვენ, ის ინფორმაცია მაქვს მეც“, - განაცხადა მიტროპოლიტმა.

ბათუმისა და ლაზეთის მიტროპოლიტი დიმიტრი (შიოლაშვილი) ინტერნეტში გავრცელებულ განცხადებაში დიდ გულისტკივილს გამოხატავს მომხდარი მოვლენების გამო. მისი განცხადებით, ენდობა გამოძიებას და მის დასრულებას ელოდება. 

„გამოვხატავ ჩემს დიდ გულისტკივილს მომხდარი მოვლენების გამო. ბრალის დამტკიცების შემთხვევაში შეიძლება ჩაითვალოს საუკუნის ტრაგედიად. ველოდებით გამოძიების დასრულებას, რომელსაც ნდობას ვუცხადებთ. ვიმედოვნებთ, კანონის უმკაცრესი სასჯელით დაისჯება ამ ვერაგული განზრახვის ყველა მონაწილე, განურჩევლად მათი სტატუსისა. თხოვნით მოგმართავთ ყველას, გამოძიების დასრულებამდე თავი შეიკავოთ ვარაუდებისაგან“, - აღნიშნულია ბათუმისა და ლაზეთის მიტროპოლიტის დიმიტრის (შიოლაშვილი) განცხადებაში, რომელსაც ის სოციალურ ქსელში ავრცელებს.

10 თებერვალს საქართველოს პროკურატურის თანამშრომლებმა ჩატარებული საგამოძიებო მოქმედებების შედეგად მკვლელობის მომზადების ფაქტზე ბრალდებულის სახით დეკანოზი გიორგი მამალაძე დააკავეს. პროკურატურის ცნობით, გამოძიების ამ ეტაპზე მოპოვებული მტკიცებულებებით ირკვევა, რომ მამალაძე ამზადებდა მაღალი იერარქიის სასულიერო პირის მკვლელობას, სწორედ ამ მიზნით შეიძინა მან გამოძიებით ამ ეტაპზე დაუდგენელი პირისგან შხამიანი ნივთიერება - ციანიდი. პროკურატურის შუამდგომლობის საფუძველზე თბილისის საქალაქო სასამართლოს განჩინებით გიორგი მამალაძეს აღკვეთის ღონისძიების სახით შეეფარდა პატიმრობა.