სააპელაციო სასამართლოს მოსამართლე ნატა ნაზღაიძის ძმა ზვიად ნაზღაიძე ადასტურებს, რომ პროკურატურაში დაკითხვაზე იმყოფებოდა.
როგორც მან საზოგადოებრივს განუცხადა, გამოძიებას კითხვები მიწის ნაკვეთთან დაკავშირებით ჰქონდა, რომელზეც მერიამ კომპენსაცია გასცა.
მისივე თქმით, გამოძიება საქმესთან მისი დის შესაძლო კავშირით არ დაინტერესებულა.
ნაზღაიძის განმარტებით, მან გამოძიებას ყველა დოკუმენტი წარუდგინა, რომელშიც ასახულია მიწის ნაკვეთის რეალური მეპატრონისა და მისი ურთიერთობა.
ზვიად ნაზღაიძის თქმით, მიწის ნაკვეთი, რომელიც მერიამ კომპენსაციის სახით გასცა, სტიქიის ზონაში მდებარე ნაკვეთის სანაცვლოდ უკვე გადაფორმებულია ზვიად ჩოხელზე და ეს ქონება მისი საკუთრება აღარაა.
ოპოზიციის ინფორმაციით, „რუსთავი 2“-ის საქმის განმხილველი კოლეგიის თავმჯდომარის, მოსამართლე ნატა ნაზღაიძის ძმას, ზვიად ნაზღაიძეს თბილისის მერიამ სახელმწიფოს კუთვნილი 1 მილიონი ლარის ქონება გადასცა.