დაბალი ტემპერატურა და უამინდობაა საქართველოს თითქმის მთელ ტერიტორიაზე.
მესამე დღეა თოვს ბათუმში. ქალაქში თოვლის საფარმა ნახევარ მეტრს მიაღწია. ინტენსიურად მიმდინარეობს გზების გაწმენდის სამუშაოები და ქალაქის ცენტრალურ ნაწილში ამ დროისთვის ავტოტრანსპორტი შეუფერხებლად მოძრაობს.
განსხვავებული ვითარებაა ბათუმის გარეუბნებში. მოსახლეობის თქმით, რამდენიმე ქუჩა ამ დრომდე არ გაწმენდილა. ნალექს სხვა ტიპის პრობლემები არ გამოუწვევია.
სინოპტიკოსების განცხადებით ზღვაზე ამ დროისთვის 4 ბალიანი შტორმი ფიქსირდება, მათივე პროგნოზით თოვა კიდევ სამ დღეს გაგრძელდება, მოსალოდნელია ქარი.
თოვს აჭარის მაღალმთიანეთშიც. მეორე დღეა შეზღუდვები მოქმედებს გომბორი -ვაზიანი-თელავის საავტომობილო გზაზე. მიუხედავად იმისა, რომ უღელტეხილზე მობილიზებულია შესაბამისი ტექნიკა, იყრება ტექნიკური მარილი და მიმდინარეობს გაწმენდითი სამუშაოები, ინტენსიური თოვა და ყინვა მდგომარეობას ართულებს.
უღელტეხილზე მოძრაობის სპეციალური რეჟიმია დაწესებული. მთელი ღამე თოვდა ქუთაისშიც. უხვი ნალექის გამო საერთაშორისო აეროპორტში რეისი გადადო. მილანის მიმართულებით თვითმფრინავი დილის 6 საათზე უნდა გაფრენილიყო, თუმცა თავად მგზავრების განმარტებით, რეისი დაგეგმილის ნაცვლად ხვალ შესრულდება.
ფრენის გადადების მიზეზებზე აეროპორტის ადმინისტრაცია ამ დრომდე კომენტარს არ აკეთებს, მგზავრები კი ეტაპობრივად სასტუმროში გადაჰყავთ. ამ ეტაპზე ქუთაისის საერთაშორისო აეროპორტიდან ყველა სხვა მიმართულებით რეისები შესრულებულია.
სინოპტიკოსები ყინვასა და ნალექს ქვეყნის მასშტაბით კიდევ რამდენიმე დღის განმავლობაში ვარაუდობენ.