"ენ-ბი-ეის" "ყველა ვარსკვლავის" მატჩის სასტარტო ხუთეულების არჩევა გულშემატკივრებს შორის, რომელიც ინტერნეტის საშუალებით მიმდინარეობდა, დღეს, თბილისის დროით, დილის ცხრა საათზე დასრულდა.

შეგახსენებთ, რომ ფანების გამოკითხვის მეორე შუალედური შედეგების მიხედვით, ზაზა ფაჩულიას 823 ათას 476 ხმა ჰქონდა და ამ შედეგით, დასავლეთ კონფერენციის ფორვარდთა და ცენტრებს შორის მეორე ადგილზე იმყოფებოდა.

საბოლოო შედეგი 19 იანვარს გამოქვეყნდება, რომელშიც, ახალი წესების თანახმად, გულშემატკივართა გარდა, მთავარი მწვრთნელების და თავად მოთამაშეების 50- პროცენტიანი ხმების რაოდენობაც შევა.

"ენ-ბი-ეის" წლევანდელი "ოლ სტარი" 19 თებერვალს ნიუ ორლეანში გაიმართება. ამასობაში, ზაზას "გოლდენ სტეიტ უორიორზმა" დღეს გამთენიისას რეგულარულის მორიგი მატჩი ჩაატარა და მოქმედ ჩემპიონს "კლივლენდ კავალიერსს" უშანსოდ, ანგარიშით 126-91 მოუგო.

ქართველმა ცენტრმა 20 წუთში 4 ქულა და 13 მოხსნა მიითვალა აქტივში. მატჩის სნაიპერი კი, კლეი ტომპსონი გახდა, რომელმაც 26 ქულით დაასრულა შეხვედრა. "გოლდენ სტეიტი" მორიგ შეხვედრას, 19 იანვარს "ოკლაჰომა სითი ტანდერის" წინაარმდეგ გამართავს.