ზაზა ფაჩულიას 8 ქულა, 3 მოხსნა, 3 შედეგიანი გადაცემა და „გოლდენ სტეიტ უორიორზის" 28-ე გამარჯვება, „ენ-ბი-ეის" მიმდინარე რეგულარულ სეზონში.

„ოკლენდელებმა", დღეს დილით, საკუთარ ორეკლ არენაზე, „ტორონტო რეპტორზი", ანგარიშით, 121-111 დაამარცხეს.

ქართველი ცენტრი კვლავ ძირითად შემადგენლობაში გახლდათ და მოედანზე თითქმის 18 წუთი დაჰყო. მასპინძლებმა გადამწყვეტ უპირატესობას პირველივე მეოთხედში მიაღწიეს, რომელიც 42-17 მოიგეს.

ორივე გუნდის რიგებში საუკეთესო ტორონტოელი დემარ დე როუზანი იყო 29 ქულით. „გოლდენ სტეიტის" ერთ-ერთმა ლიდერმა, სტეფ კარიმ, 28 ქულა, 7 მოხსნა და ამდენივე პასი მიითვალა აქტივში.

სტივ კერის გუნდი, დასავლეთ კონფერენციის ლიდერია. „უორიორზი" მორიგ შეხვედრას ზეგ, დალას, „მავერიქსის" წინააღმდეგ ჩაატარებს. #სპორტი