წინა კვირას გამართული სინოდის სხდომის ოქმი გამოქვეყნებულია. საქართველოს საპატრიარქოს ვებ-გვერდზე გავრცელებულ ტექსტში ნათქვამია, რომ სხვა საკითხებთან ერთად, სინოდმა კუნძულ კრეტაზე ივნისში გამართულ წმინდა და დიდი კრების დოკუმენტებზე იმსჯელა.
სინოდმა დაადგინა, რომ, რადგან კრებაში ოთხი მართლმადიდებელი ეკლესია არ მონაწილეობდა და კრების მომზადებისა და ჩატარების დროს ეკლესიათა მიერ დადგენილი კონსენსუსის პრინციპი დაირღვა, კრეტის კრების დადგენილებები საქართველოს მართლმადიდებელი ეკლესიისთვის სავალდებულო ვერ იქნება.
სინოდის სხდომაზე ინფორმაცია მოისმინეს მედიასა და სოციალურ ქსელში ბოლო დროს ეკლესიასთან დაკავშირებული სხვადასხვა სახის ტექსტებისა და ქადაგებების შესახებ.
სინოდმა სასულიერო პირებს და მრევლს მოუწოდა, რომ კეთილგონიერება გამოიჩინონ და პროვოკაციებს არ აჰყვნენ, რადგან მოქალაქეები რეალურად არსებულ ვითარებას ნაკლებად იცნობენ და ეს მათთვის შეიძლება დაბრკოლებისა და ცოდვის მიზეზი გახდეს.