ყველაზე მტკივნეული პროცესი სახელმწიფო უწყებებში: ოპტიმიზაციის გამო რამდენიმე საჯარო სამსახურში თანამშრომელთა დათხოვნა დაიწყო.

თავდაცვის სამინისტროს რიგებიდან 100-მდე პირის გაშვების შემდეგ რადიკალურ საკადრო ცვლილებებს აანონსებს განათლების სამინისტრო, რომელიც 250-მდე ადამიანის გათავისუფლებას გეგმავს.

კადრების შემცირებას არ გამორიცხავს შინაგან საქმეთა მინისტრიც, რომელიც სწორედ ოპტიმიზაციასთან დაკავშირებული გუშინდელი განცხადების გამო მწვავე კრიტიკის სამიზნე ხდება.

2017 წლის ბიუჯეტის მიხედვით, სამინისტროებში ადმინისტრაციული ხარჯები 10 %-ით უნდა შემცირდეს. თუმცა ზოგიერთი უწყება გეგმის შესრულებას ხელფასების კლებით და პრემიებზე უარის თქმით აპირებს. ამ სტრატეგიას მიმართავს ჯანდაცვის სამინისტრო, სადაც, დღეს, თანამშრომლების მუშაობის გასაკონტროლებლად სპეციალური სამსახური შეიქმნა.