9-თვიანი სასამართლო განხილვების შემდეგ ნავთლუღის სპეცოპერაციის საქმეზე მოსამართლემ განაჩენი დღეს უნდა გამოაცხადოს.
კუდ-ის ყოფილი მაღალჩინოსნების დავით ახალაიას და გიორგი დგებუაძის ინტერესების დამცველები მიიჩნევენ, რომ საქმეზე გამამართლებელი განაჩენი უნდა დადგეს, თუმცა საწინააღმდეგოს ამტკიცებს სახელმწიფო ბრალდება, რომელიც ამბობს, რომ მათ მიერ დაკითხული 40-მდე მოწმე ყოფილი მაღალჩინოსნების ბრალეულობას ადასტურებს.
მთავარი საგამოძიებო უწყება მათ უფლებამოსილების გადამეტებას და განზრახ მკვლელობას ედავება. შეგახსენებთ, რომ დავით ახალაია მიმალვაში იმყოფება, გიორგი დგებუაძის ექსტრადირება კი მიმდინარე წლის 22 მარტს განხორციელდა.
ბოლო სასამართლო პროცესზე, რომელიც გუშინ გაიმართა, ბრალდებულმა საბოლოო სიტყვის თქმის უფლებით ისარგებლა და განაცხადა, რომ წარდგენილ ბრალდებაში თავს დამნაშავედ არ მიიჩნევს.