შინაგან საქმეთა მინისტრის მოადგილე მესამე სექტორის ბრალდებებს და შენიშვნებს პასუხობს. საუბარია დანაშაულის სტატისტიკაზე.

არასამთავრობო ორგანიზაციებისა და მედიისთვის გამართული პრეზენტაციის შემდეგ შალვა ხუციშვილი ამბობს, რომ უწყებას სტატისტიკური მონაცემების შეცვლის ან გაყალბების არანაირი ტექნიკური საშუალება არ გააჩნია.

სამინისტროს ინიციატივით გამართულ შეხვედრაზე უწყების წარმომადგენლებმა დანაშაულის რეგისტრაციისა და სტატისტიკის მეთოდოლოგიაზე ისაუბრეს.

მინისტრის მოადგილის განმარტებით, სამინისტრო საქსტატს რეგისტრირებული დანაშაულის შესახებ ინფორმაციას ყოველთვიურად აწვდის. სწორედ ამ გარემოებით ხსნის ხუციშვილი იმ ფაქტს, რომ სამინისტრო ყოველთვიურად შსს-ს გვერდზე სტატისტიკას აღარ აქვეყნებს.