დიდთოვლობა მთიან აჭარაში. ხულოსა და შუახევის ზოგიერთ სოფელში თოვლის საფარმა 80 სანტიმეტრს მიაღწია. ხულოში დაზიანდა ელექტროსადენები, რის გამოც 15-მდე სოფელს შეუწყდა ელექტროენერგიის მიწოდება.

ადგილზე მუშაობს ენერგოპროჯორჯიას ბრიგადები. უშუქობის გამო რამდენიმე საჯარო სკოლაში სასწავლო პროცესი შეჩერდა. შეფერხებებია გზებზე. შუახევისა და ხულოს მუნიციპალიტეტების ცენტრებამდე ავტომანქანების მოძრაობა არ შეწყვეტილა, თუმცა სოფლების მიმართულებით გადაადგილება მხოლოდ მაღალი გამავლობის ორხიდიანი ავტომანქანებითა და მოცურების საწინააღმდეგო ჯაჭვებით არის შესაძლებელი.

ყველა მიმართულებით მიმდინარეობს გაწმენდითი სამუშაოები. სინოპტიკოსები გამოდარებას დღეს, დღის მეორე ნახევარში ვარაუდობენ.