„ინფლაციის ინდექსი საერთაშორისოდ აპრობირებული ინდექსია, რომელიც საქართველოში მოქმედებს და რომელსაც საკმაოდ ბევრი შემოწმება აქვს გავლილი. დღესდღეობით ინფლაციის პრობლემა არ გვაქვს. მომავალში თუ გვქნება, ეროვნულ ბანკს ამის წინ აღდგომის საშუალებები აქვს“, - ამის შესახებ ეროვნული ბანკის პრეზიდენტმა საზოგადოებრივის გადაცემა „მთავარში“ სტუმრობისას განაცხადა.

კობა გვენეტაძის განცხადებით, საქართველოს ბოლო წლების განმავლობაში ინფლაციის კარგი მაჩვენებელი აქვს და ბოლო 12 თვის მაჩვენებელიც საკმაოდ დაბალია. მისივე თქმით, ფასები შეიძლება გაიზარდოს რიგ პროდუქტებზე, თუმცა არის პროდუქტები, რომლებზეც ფასები მცირდება, ხოლო დეფლაციაში გადასვლა ქვეყნისთვის წამგებიანი იქნება.

„თუ გადავხედავთ, მაგალითად, ბოლო 8 წლის განმავლობაში საქართველოში ინფლაცია საშუალოდ 3 პროცენტი იყო. გეთანხმებით, რომ შეიძლება ერთ პროდუქტზე, ორ პროდუქტზე, სამ პროდუქტზე ფასები გაიზარდოს, მაგრამ არის აგრეთვე პროდუქტები, რომლებზეც ფასები მცირდება. ამ წუთში შემიძლია გითხრათ, რომ ბოლო მონაცემებით, ბოლო 12 თვის განმავლობში ფასების ზრდა საქართველოში 0.6 % იყო. ნიშნავს თუ არა ეს, რომ საერთოდ არასდროს გაიზრდება ფასები? არ ნიშნავს, არავითარ შემთხვევაში. იქნება ფაქტორები, რომლებიც იმოქმედებს ფასების ზრდაზე და სხვათა შორის, დაბალი ინფლაციაც არ არის ძალიან კარგი და თუ ჩვენ მინუსების ინფლაციაზე ვილაპარაკებთ, ეს უკვე დეფლაცია იქნება და ეს ასევე არასასურველია ეკონომიკისთვის, რადგანაც მოთხოვნას ამცირებს, ისევე როგორც, მაღალი ინფლაცია“, - განმარტავს კობა გვენეტაძე.

ეროვნული ბანკის პრეზიდენტი დასძენს, რომ თუ ფასების ზრდას ექნება ადგილი, ეროვნულ ბანკს გააჩნია მექანიზმები, პროცესის შესაჩერებლად.

„რომ შევხედოთ ზოგადად, ცუდი გამოცდილება არ გვაქვს ამასთან დაკავშირებით და ეროვნულ ბანკს გააჩნია ბერკეტები იმასთან დაკავშირებით, თუ მოხდება შემჩნევა, რომ არის მოლოდინები ფასების ზრდის, რომ იზრდება ფასები, მიიღოს საკმარისი ზომები იმისათვის, რათა ეს პროცესი შეაჩეროს“, - აცხადებს გვენეტაძე.