სანდრა რულოვსი სამეგრელოს რეგიონში გასაიდუმლოებულ შეხვედრებს მართავს. საინფორმაციო სააგენტო smo news-მა ამის შესახებ ექსკლუზიურად შეიტყო. რულოვსი ზუგდიდში გვიან ღამით ჩამოვიდა და ზუგდიდის ყოფილი გამგებლის, ალექსანდრე ქობალიას სახლში დარჩა.
დილიდან კი სანდრა რულოვსი წალენჯიხის მუნიციპალიტეტში გაემგზავრა. მას თან ახლდა უმცროსი ვაჟის, ნიკოლოზ სააკაშვილის ზუგდიდელი ძიძა, ვინმე ლამარა, ასევე სამაუწყებლო კომპანია “რუსთავი 2”-ის სამეგრელოს ბიუროს კორესპონდენტი ემა გოგოხია, ზუგდიდის ყოფილი გამგებელი და დამოუკიდებელი ტელეკომპანია “ოდიში”-ს მეპატრონე ალექსანდრე ქობალია.
სანდრა რულოვსი თანმხლებ პირებთან ერთად 2013 წელს ავღანეთში დაღუპული ვლადიმერ შანავას ოჯახს დაუპატიჟებლად ესტუმრა. თავდაპირველად რულოვსის თანმხლებმა პირებმა smo news-ს განუცხადეს, რომ შანავების ოჯახში მათი მოთხოვნით ესტუმრნენ, თუმცა ამჟამადაც იცრუა ყოფილმა პირველმა ლედიმ. აწგარდაცვლილი, ვლადიმერ შანავას დედა აცხადებს, რომ რულოვსი მას სახლში არ მოუწვევია და არც არანაირი კონტაქტი მის თანმხლებ პირებთან ჰქონია.
“მოულოდნელად ამდენი მანქანა რომ მომადგა კარზე შემეშინდა. ნამდვილად არ ველოდი მე მას და არ ვიცოდი რა დამემართა. სანდრა რულოვსი თანმხლებ პირებთან ერთად შემოვიდა ლადოს ოთახში, სანთელი დაანთო და წავიდა. კონკრეტულად მას ჩვენს ოჯახში აბსოლიტურად არაფერზე არ უსაუბრია”-განაცხადა ვლადიმერ შანავას დედამ.
სანდრა რულოვსის თანმხლებმა პირებმა პრესასთან იცრუეს, თითქოს სანდრა რულოვსს ვლადიმერ შანავამ სოციალური ქსელის საშუალებით დახმარება სთხოვა. შანავას დედა ასეთ ფაქტს კატეგორიულად უარყოფს.
წალენჯიხაში სტუმრობის შემდეგ სანდრა რულოვსმა ამავე მუნიციპალიტეტის დაბა ჯვარში გადაინაცვლა. რულოვსი ჯვარის ცენტრში, დევნილების კომპაქტურ დასახლებას ეწვია, თუმცა მისი მომლოდინე დევნილები მას სამწუხაროდ ვერ შეხვდნენ. სანდრა რულოვსი დაქოქილ მანქანაში სირბილით ჩაჯდა და აღნიშნული ტერიტორია უკომენტაროდ დატოვა.
“ვერ ხედავდით როგორ გაიქცა? ჩვენ კი აქ ველოდებოდით. ამ დასახლებაში წინა კარებიდან შევიდა და იგივე შენობა უკანა კარების საშუალებით დატოვა. არც კი მოგვაქცია ყურადღება, პირიქით, დაგვცინა”-აცხადებენ დევნილები.