ტაბულას დირექტორმა და ჟურნალისტმა თამარ ჩერგოლეიშვილმა თბილისის მერთან, დავით ნარმანიასთან, გასაუბრება მაშინ სცადა, როცა ის ბარნოვის ქუჩაზე, მხოლოდ პრესსამსახურის კამერის თანხლებით, სარეკონსტრუქციო სამუშაოებს ათვალიერებდა.
მას შემდეგ რაც პრესსამსახურის კამერამ მადლიერი მოქალაქე და დავით ნარმანია ჩაწერა, თამარ ჩერგოლეიშვილმა, რომელიც საკუთარი მობილურით იღებდა შეხვედრას, ქალაქის არჩეულ მერს კითხვა დაუსვა.
საზოგადოების წინაშე ანგარიშვალდებული პოლიტიკური თანამდებობის პირის მიმართ კითხვები პრესსამსახურმა „ღონისძიების ჩაშლად“ შეაფასა. „მე თქვენთან ანგარიშვალდებული არ ვარ!“, “თქვენი საქმე არ არის, ვის რა რეიტინგი აქვს“, „მაინტერესებს, რამდენი ხანი უნდა მსდიო?“ - მიმართავდა მერი მოქალაქეს. ნარმანია დაბეჯითებით ითხოვდა ჩერგოლეიშვილს პრესსამსახურისთვის მიემართა კითხვებით, მიუხედავად იმისა, რომ თავად ადგილზე იმყოფებოდა.