ნატოს „პარტნიორობა მშვიდობისათვის“ ნდობის ფონდის პროექტ „საქართველო IV“-ის ფარგლებში, აშშ-ის ევროპული სარდლობის (EUCOM) მიერ EOD-ის პირველი დონის ინსტრუქტორთა მომზადების მესამე, დასკვნითი ფაზის სწავლების 10 კურსდამთავრებულს საქართველოს შეიარაღებული ძალების შტაბის უფროსმა, გენერალ მაიორმა ვახტანგ კაპანაძემ და აღმოსავლეთ სარდლობის სარდალის მოადგილემ, პოლკოვნიკმა გიორგი მათიაშვილმა სერთიფიკატები გადასცეს. ღონისძიებას აშშ-ის ევროპული სარდლობის (EUCOM) EOD-ის ამერიკელი ინსტრუქტორების ჯგუფის, შეიარაღებული ძალების საინჟინრო ბრიგადის წარმომადგენლები და სხვადასხვა ქვეყნის სამხედრო ატაშეები დაესწრნენ.

სერთიფიკატების გადაცემის საზეიმო ცერემონიალის დაწყებამდე, სამხედრო მოსამსახურეებმა და მოწვეულმა სტუმრებმა, საქართველოს ტერიტორიული მთლიანობისთვის ბრძოლასა და საერთაშორისო სამშვიდობო მისიებში დაღუპულ გმირებს წუთიერი დუმილით პატივი მიაგეს.

საქართველოს შეიარაღებული ძალების შტაბის უფროსმა, გენერალ მაიორმა ვახტანგ კაპანაძემ საინჟინრო ბრიგადის პირად შემადგენლობას სიტყვით მიმართა და კურსის მნიშვნელობაზე გაამახვილა ყურადღება:

“ძალიან მნიშვნელოვანია ის დახმარება, რომელსაც ჩვენი პარტნიორები გვიწევენ, ჩვენი მესანგრეების მომზადებაში. ისინი უდიდესი რისკის შემცველ სამსახურში იმყოფებიან, ამდენად ტექნიკური და ცოდნითი აღჭურვილობა რა თქმა უნდა ძლიან მნიშვნელოვანია თითოეული მათგანისათვის. თითოეული მათგანის პროფესიონალიზმი და უნარ-ჩვევები ნიშნავს რამდენიმე ათეულის თუ არა ასეულ გადარჩენილ სიცოცხლეს. ძალიან მოხარულები ვართ, რომ კიდევ ერთხელ ჩვენი სამხედრო მოსამსახურეები დაეუფლნენ დამატებით ცოდნას და მიიღეს ის საჭირო აღჭურვილობა, რომელიც ჭირდება დღევანდელ მათ ძალიან რთულ სამსახურს.“

საზეიმო ცერემონიალის შემდეგ საინჟინრო ბრიგადის კაპელანმა, მამა ზაქარიამ ბრიგადის პირადი შემადგენლობა და წარჩინებული კურსდამთავრებულები დალოცა.

EUCOM-ის სწავლება მიზნად ისახავს სამხედრო მოსამსახურეებისათვის აუფეთქებელი საბრძოლო მასალების აღმოჩენის, უსაფრთხო ადგილას გადატანისა და ადგილზე განადგურების ხერხების გაცნობას ასევე, განნაღმვით ოპერაციებში სამხედრო ინჟინრებით დაკომპლექტებული ასეულის შესაძლებლობების გაზრდას.

ნატოს „პარტნიორობა მშვიდობისათვის“ ნდობის ფონდის პროექტ „საქართველო IV“-ის ფარგლებში, აშშ-ის ევროპული სარდლობის (EUCOM) მიერ EOD-ის პირველი დონის ინსტრუქტორთა მომზადების მესამე, დასკვნითი ფაზის სწავლების პრაქტიკული მეცადინეობები ვაზიანის სამხედრო პოლიგონზე ჩატარდა.

ვაზიანის პოლიგონზე ამერიკულმა მხარემ სწავლების მონაწილე 10 ინსტრუქტორს, საინჟინრო ბრიგადის EOD ასეულისთვის საჩუქრად გადაცემული, დისტანციური ამფეთქი მანქანები წარუდგინა. ამერიკელმა სამხედროებმა ქართველ კოლეგებს მანქანების ტექნიკური შესაძლებლობები და გამოყენების წესები გააცნეს. თეორიული ნაწილის შემდეგ, სამხედრო მოსამსახურეებმა დისტანციური ამფეთქი მანქანები პრაქტიკულადაც გამოსცადეს.

EUCOM-ის ორკვირიან კურსში საინჟინრო ბრიგადის EOD ასეულის 30 სამხედრო მოსამსახურე მონაწილეობდა, რომელთაგან 10 სამხედროს უკვე გავლილი აქვს სწავლების პირველი და მეორე ფაზა. სწავლების მესამე ფაზა მომზადებული ქართველი ინსტრუქტორების მიერ დაგეგმილი სამუშაოების ამერიკული მხრიდან მონიტორინგს გულისხმობს.