ვენეციის 57-ე ხელოვნების საერთაშორისო გამოფენისთვის საქართველოს სახელით წარსადგენი პროექტის შესარჩევად კონკურსი გამოცხადდა. კულტურის მინისტრმა მიხეილ გიორგაძემ ჟურნალისტებთან 2017 წლის ვენეციის ბიენალეს პროგრამაზე ისაუბრა და ქართველ ხელოვანებს კონკურსში მონაწილეობისკენ მოუწოდა. ვენეციის ბიენალე 13 მაისიდან 26 ნოემბრამდე ვენეციაში გაიმართება. საქართველოს ეროვნული პავილიონისთვის კი არსენალის ტერიტორიაზე 115 კვადრატული მეტრი ფართობის სივრცე იქნება გამოყოფილი. გამარჯვებული პროექტისთვის განკუთვნილი თანხა 160 000 ლარს შეადგენს.