თავდაცვის მინისტრმა ნორვეგიის ელჩს უმასპინძლა
საქართველოს თავდაცვის მინისტრმა ლევან იზორიამ ნორვეგიის სამეფოს საგანგებო და სრულუფლებიან ელჩს, ბარდ ივარ სვენდსენს უმასპინძლა. თავდაცვის სამინისტროში გამართულ შეხვედრას მინისტრის პირველი მოადგილე ლელა ჩიქოვანი და ნორვეგიის საელჩოს წარმომადგენელი ჰენრიკ ფოინ შარვა დაესწრნენ.
ლევან იზორიამ ნორვეგიელ დიპლომატს საქართველოს სუვერენიტეტისა და ტერიტორიული მთლიანობის, ასევე ქვეყნის ევრო-ატლანტიკურ სტრუქტურებში მხარდაჭერისთვის მადლობა გადაუხადა. ყურადღება გამახვილდა თავდაცვის სფეროში ორმხრივ თანამშრომლობაზე და რეგიონის უსაფრთხოების საკითხზე. როგორც თავდაცვის მინისტრმა აღნიშნა, მაღალი დონის ვიზიტებს ორმხრივი ურთიერთობების გაღრმავებაში მნიშვნელოვანი ყურადღება ექცევა.
შეხვედრაზე ნატო-საქართველოს არსებითი პაკეტის იმპლემენტაციის პროცესში ნორვეგიული მხარის დახმარებაზეც ისაუბრეს. მინისტრმა ხაზგასმით აღნიშნა ნორვეგიელი ექსპერტების როლი წვრთნისა და შეფასების ერთობლივი ცენტრის მუშაობაში.
მხარეებმა ნორვეგიის შიდა გვარდიასა და საქართველოს ეროვნულ გვარდიას შორის თანამშრომლობის საკითხიც განიხილეს. ყურადღება გამახვილდა ორმხრივი თანამშრომლობის საკითხებში, საქართველოსა და ნორვეგიის თავდაცვის აკადემიებს შორის გაფორმებულ შეთანხმებაზე, რომელიც პარტნიორობის კიდევ უფრო გაღრმავებას უწყობს ხელს.