რუსთავში, კოსტავას გამზირზე უკვე 8 თვეა სარემონტო სამუშაოები მიმდინარეობს და მიმდებარე ტერიტორიაზე ქუჩები გადათხრილია, შენობები კი ხარაჩოებშია მოქცეული. შესაბამისად, ამ ტერიტორიაზე მდებარე სავაჭრო და საკვები ობიექტების მუშაობა შეფერეხებულია. სამუშაოებს კომპანია „დაგი“ აწარმოებს, რომელმაც რამდენიმე თვის წინ ბიძინა ივანიშვილისთვის ტიტას (ხე) ციხისძირიდან ურეკში გადატანა უზრუნველჰყო. "ერთიანი ნაციონალური მოძრაობის" რუსთავის მაჟორიტარი დეპუტატობის კანდიდატი მამუკა ჩიქოვანი ადგილობრივ ხელისუფლებას მოუწოდებს, სამუშაოების შემსრულებელ კომპანიას სამუშაოების დროულად დასრულება მოსთხოვოს, ან აქ მდებარე სავაჭრო და საკვებ ობიქეტებს კომპენსაცია გადაუხადონ, ვინაიდან მათი სრულყოფილი მუშაობა უკვე თვეებია შეფერხებულია.