შინაგან საქმეთა მინისტრმა გიორგი მღებრიშვილმა დღეს თქვა, რომ ზოგიერთი პოლიტიკური პარტია არჩევნების პერიოდში გარკვეულ პროვოკაციებს გეგმავს. მღებრიშვილი არ საუბრობს დეტალებზე თუ რა ინფორმაციის საფუძველზე აკეთებს ამ განცხადებას და რომელი პარტიების შესახებ საუბრობს. ამასთანავე ამბობს, რომ სამინისტრო გააკეთებს ყველაფერს, რათა ქვეყანაში დესტაბილიზაცია თავიდან იქნეს აცილებული. საქართველოს პრემიერმინისტრი გიორგი კვირიკაშვილი ამბობს, რომ გიორგი მღებიშვილის განცხადებას საფუძველი აქვს. იუსტიციის მინისტრი თეა წულუკიანიც ამბობს, რომ მღებრიშვილის განცხადება კონკრეტულ მტკიცებულებებს ეყრდნობოდა. თუმცა, არცერთი აკონკრეტებს, თუ რას გულისხმობენ. პარლამენტის თავმჯდომარე დავით უსუფაშვილი შინაგან საქმეთა მინისტრს მოუწოდებს ზოგადი ვარაუდების გამოთქმის ნაცვლად, მისმა სამინისტრომ კონკრეტული ფაქტები წარადგინოს. საპარლამენტო უმრავლესობაში ამბობენ, რომ დესტაბილიზაციას ქვეყანაში ერთიანი ნაციონალური მოძრაობა გეგმავს. საპარლამენტო უმცირესობაში კი მათ პასუხობენ, რომ წინასაარჩევნო პროცესში მომხდარი ყველა ინციდენტი, და მათ შორის კორცხელის ინციდენტიც ქართული ოცნების მიერ იყო პროვოცირებული.