სამეგრელოსა და გორში ამომრჩეველთან შეხვედრისას მომხდარი დაპირისპირების შემდეგ ოპოზიცია ხელისუფლებას სწრაფი რეაგირებისკენ მოუწოდებს. ნაციონალური მოძრაობა საარჩევნო საკითხებზე მომუშავე უწყებათაშორის კომისიასაც მიმართავს, რომლის სხდომა ხვალ არის ჩანიშნული.
რესპუბლიკურ პარტიაში მიიჩნევენ, რომ ძალადობაზე პასუხისმგებლობა ხელისუფლებას ეკისრება და ქართული ოცნების წევრის, თამარ ჩუგოშვილის განცხადებას აკრიტიკებენ, სადაც მოსალოდნელ პროვოკაციებზე იყო საუბარი. მმართველ გუნდში კი აცხადებენ, რომ ყველა ინციდენტის მათთან დაკავშირება არასწორია.
გუშინ გაკეთებულ განცხადებებთან დაკავშირებით დამატებითი განმარტება გააკეთა თამარ ჩუგოშვილმა და აღნიშნა, რომ პროვოკაციების შესახებ ინფორმაცია სხვადასხვა წყაროდან აქვთ, მათ შორის ადგილობრივი ოფისებიდან. ქართული ოცნების აღმასრულებელი მდივანი კი ამბობს, რომ ჩუგოშვილის განცხადება „პრევენციული“ იყო.