საქართველოს ახალგაზრდა იურისტთა ასოციაციის ყოფილი თავმჯდომარე და პარტია ქართული ოცნების ახალი სახე, თამარ ჩუგოშვილი აცხადებს, რომ წინასაარჩევნოდ ნაციონალური მოძრაობა გარკვეული ტიპის არეულობებს გეგმავს. ჩუგოშვილი მოუწოდებს სადამკვირვებლო ორგანიზაციებს მაქსიმალური ყურადღება გაამახვილონ ასეთ ფაქტებზე. ამის შესახებ მან დღეს გამართულ სპეციალურ ბრიფინგზე ისაუბრა, სადაც მედიის კითხვებს არ უპასუხა და არც ის დააკონკრეტა, რა ტიპის არეულობებზე საუბრობს და საიდან აქვს ინფორმაცია.
არჩევნების ცუდ ფორმატში გადაყვანის მსურველ ერთადერთ ძალად მოიაზრებს ნაციონალურ მოძრაობას ქართული ოცნების გენერალური მდივანიც. კახა კალაძე კონკრეტული ორგანიზაციის შექმნაზე საუბრობს. ანალოგიური პოზიცია აქვთ მმართველი გუნდის სხვა წევრებს.
მმართველი გუნდის ბრალდებებს აბსურდულს უწოდებენ ნაციონალურ მოძრაობაში და შინაგან საქმეთა ყოფილი მინისტრის, ალექსანდრე ჭიკაიძის განცხადებებს იხსენებენ დესტაბილიზაციასთან დაკავშირებით.