სკოლამდელი აღზრდის დაწესებულებებში სასწავლო პროცესის დაწყებამდე რამდენიმე დღით ადრე ბოლნისის მუნიციპალიტეტის გამგებლის მოვალეობის შემსრულებელმა დავით შერაზადიშვილმა ინფრასტრუქტურის სამსახურის უფროსთან ერთად ის სამი ბაღი მოინახულა, სადაც სარეაბილიტაციო სამუშაოები მიმდინარეობდა.
ქალაქ ბოლნისის №3, №5 და სოფელ რატევნის საბავშვო ბაღებს რეგიონალური განვითარების ფონდიდან გამოყოფილი თანხებით სრული რეაბილიტაცია ჩაუტარდა. მთლიანად კეთილმოეწყო შენობობი და ეზოები. სამივე ბაღში მოხდა ახალი გადახურვა, შეიცვალა შიდა ქსელები, კარ-ფანჯრები, დაიდგა დიდი ტევადობის რეზერვუარები, დამონტაჟდა ცენტრალური გათბობა და შეიღება ფასადები. სამუშაოებზე დასაქმებული იყო 100-მდე ადგილობრივი მუშახელი.
ბოლნისის მუნიციპალიტეტში მოქმედი საბავშვო ბაღების სარეაბილიტაციო სამუშაოები მესამე წელია ეტაპობრივად ხორციელდება. 12 საბავშვო ბაღიდან 9 ბაღი თანამედროვე სტანდარტების შესაბამისია, რაც შეეხება დარჩენილ 3 ბაღს მათი რეაბილიტაცია მომდევნო წელს იგეგმება.
ამ ეტაპზე სამივე საბავშვო ბაღში მიმდინარეობს დასუფთავების სამუშაოები. ახალი სასწავლო წელი ბოლნისის სკოლამდელ დაწესებულებებში 7 სექტემბერს დაიწყება.