2008 წლის აგვისტოს რუსეთ-საქართველოს ომის მერვე წლისთავის აღნიშვნა, ტრადიციის თანახმად, მუხათგვერდის ძმათა სასაფლაოზე დაიწყო. გმირთა სამუდამო განსასვენებელს პატივი მიაგეს და ყვავილებით შეამკეს პრემიერმინისტრმა გიორგი კვირიკაშვილმა, ვიცეპრემიერმა კახა კალაძემ, თავდაცვის მინისტრმა ლევან იზორიამ, სახელმწიფო უსაფრთხოების სამსახურის ხელმძღვანელმა ვახტანგ გომელაურმა, შინაგან საქმეთა მინისტრმა გიორგი მღებრიშვილმა და მინისტრთა კაბინეტის სხვა წევრებმა. სასაფლაოს ეწვივნენ გენერალური შტაბის უფროსი ვახტანგ კაპანაძე და გენერალური შტაბის სხვა მაღალჩინოსნებიც. მუხათგვერდის ძმათა სასაფლაოზე, გმირთა მემორიალი გვირგვინით შეამკო საქართველოს პრეზიდენტმაც.
თავდაცვის მინისტრი ლევან იზორია საომარი მოქმედებების დროს დაღუპულ სამხედროთა ოჯახის წევრებს შეხვდა, მოისმინა მათი პრობლემები და პირობა მისცა, რომ უფრო დეტალურად სასაუბროდ, პრობლემების რეალურად აღმოსაფხვრელად მათთან სპეციალურ შეხვედრას გამართავს.
„რვა წელი გავიდა ყველაზე ტრაგიკული მოვლენიდან საქართველოს უახლეს ისტორიაში. მიუხედავად იმისა, რომ ეს იყო სულ რამდენიმედღიანი ომი, ჩვენმა ქვეყანამ ძალიან დიდი დარტყმა მიიღო. ქედს ვიხრი ყველა იმ გმირი ჯარისკაცის ხსოვნის წინაშე, რომელიც შეეწირა სამშობლოსთვის უსასტიკეს, არათანაბარ ბრძოლას. რუსეთის ოკუპაციის შედეგად საქართველოში ჩვენივე მოქალაქეები გახდნენ დევნილები, ომის შედეგად ჩვენ კიდევ უფრო მეტად დავშორდით აფხაზებსა და ოსებს. უნდა ითქვას, რომ საქართველოს მშვიდობიან გამთლიანებას ალტერნატივა არ გააჩნია,“ - განაცხადა პრემიერმინისტრმა გიორგი კვირიკაშვილმა
„პატივს მივაგებ აგვისტოს ომში დაღუპულ გმირებს. მათ გვიჩვენეს საუკეთესო მაგალითი სამშობლოსთვის თავდადებისა და თავგანწირვის. თითოეული ქართველი მუდამ იამაყებს მათი სახელებით. მინდა მადლობა გადავუხადო მათ ოჯახებს, დედებს ასეთი შვილების აღზრდისთვის. დღეს ისინი აქ არიან, დღეს ისინი გმირი დედები არიან. მე მინდა დავდო პირობა, რომ მათ ხსოვნასთან ერთად ვიზრუნებ და დავიცავ თითოეული ჯარისკაცის პატივსა და ღირსებას, მათთან ერთად ვემსახურები საქართველოს,“ - განაცხადა თავდაცვის მინისტრმა.
„უპირველეს ყოვლისა მინდა სულითა და გულით მივუსამძიმრო და ამავე დროს მადლობა ვუთხრა დაღუპულების ოჯახის წევრებს, მშობლებს, რომლებმაც გაიღეს საუკეთესო, რაც მათ გააჩნდათ ქვეყნისთვის. დარწმუნებული ვარ, რომ მათ მიერ გაწეული ღვაწლი არამარტო დღეს იძლევა თავის ნაყოფს არამედ მომავალშიც ასევე მოვალთ და ამ ბიჭებს ვახარებთ გამარჯვებას,“ - თქვა გენერალ-მაიორმა ვახტანგ კაპანაძემ.