"ერთიანი ნაციონალური მოძრაობის" წარმომადგენელი ოთარ კახიძე იუსტიციის მინისტრს და პრემიერს მოუწოდებს დაუყოვნებლივ მოიძიონ და სასამართლოს გაუგზავნონ მონაცემები 2006 წელს რუსეთიდან დეპორტირებული ქართველების შესახებ, რომლებიც წამებას, არაჰუმანურ, დამამცირებელ მოპყრობას დაექვემდებარნენ.
"2014 წლის 3 ივლისს ადამიანის უფლებათა ევროპულმა სასამართლომ გამოიტანა უმნიშვნელოვანესი გადაწყვეტილება. საქართველომ მოუგო რუსეთის ფედერაციას სახელმწიფოთაშორისი დავა, რომელიც 2006 წელს რუსეთში მცხოვრებ ქართველთა დევნას და მათ დეპორტაციას ეხებოდა.

სტრასბურგის სასამართლომ დაადგინა, რომ რუსეთიდან ევროკონვენციის დარღვევით 4600-ზე მეტი ქართველი გამოაძევეს, აქედან 2380 ადამიანი დააპატიმრეს, რომლებიც წამებას, არაჰუმანურ, დამამცირებელ მოპყრობას დაექვემდებარნენ. გარდაიცვალა სამი პირი. აღნიშნული საქმე საქართველოს იუსტიციის სამინისტრომ წინა ხელისუფლების მმართველობისას აწარმოა, ხოლო გადაწყვეტილება ივანიშვილის ხელისუფლების პირობებში გამოქვეყნდა.

უკვე ორი წელი გავიდა ამ გადაწყვეტილების გამოტანიდან და იუსტიციის მინისტრ წულუკიანს არცერთი ქმედითი ნაბიჯი არ გადაუდგამს, რომ მოეძიებინა და ევროსასამართლოსთვის მიეწოდებინა ინფორმაცია იმ 4600-ზე მეტი პირის შესახებ, რომლებზეც კონვენციის დარღვევა დადგინდა.

ჩემი ინფორმაციით, წულუკიანმა სასამართლოს გაუგზავნა მონაცემები მხოლოდ 600 პირზე, რაც არის ძალიან მცირე რაოდენობა და ივანიშვილის მთავრობის მავნებლური უმოქმედობით, 4000-მდე ჩვენი თანამემამულე კარგავს შანსს, მიიღოს კომპენსაცია ათასობით ევროს ოდენობით.

მოვუწოდებ საქართველოს იუსტიციის მინისტრსა და პრემიერ-მინისტრს, დაუყოვნებლივ მიიღონ ყველა ზომა, რათა მოიძიონ და სასამართლოს გაუგზავნონ მონაცემები დეპორტირებული ქართველების შესახებ. ამისათვის მათ უნდა აამოქმედონ ცხელი ხაზი, შექმნან ელექტრონული პორტალი, აამუშავონ საკონსულოები და ყველა მექანიზმით მიაწოდონ ინფორმაცია ჩვენ თანამემამულეებს, რომ საქმე მოგებულია და კომპენსაციის მიღება არის რეალისტური.

ცნობისათვის, კვიპროსსა და თურქეთს შორის სახელმწიფოთაშორისი დავა დასრულდა 90 მილიონი ევროს დაკისრებით თურქეთისათვის. ჩვენ შემთხვევაში, სწორი მუშაობის პირობებში, რეალისტური იქნებოდა დაახლოებით 65-75 მილიონი ევროს დაკისრება რუსეთისთვის, რაც შემდგომ განაწილდებოდა იმ 4600-ზე მეტ ადამიანზე, რომელთა უფლებებიც შელახა რუსეთის ფედერაციამ.

რუსეთის ფედერაციასთან მშვიდობიანი და ამავე დროს, პრინციპული პოლიტიკის ფარგლებში აუცილებელია საერთაშორისო სასამართლო ინსტიტუტების მაქსიმალურად გამოყენება, რათა ყველა დიპლომატიური და სამართლებრივი გზით დავიცვათ ჩვენი ქვეყნის ინტერესები."